車一到，「Supercharger喎，咦，原廠已經用AD07胎？幾好喎。」換着一般24歲𡃁星，可能會叫我開個頭冚俾佢睇吓副偈（此乃中置引擎車）。你醒我都精，借嚟Elise頂級嘅SC版，應該滿足到落過Track玩嘅黃又南，「滿足……我頭先大直路踩到差唔多XX都仲有力。」如果本月8號下午，喺將軍澳工業區見到黑色物體以高速飆過，唔使驚，就係佢哋。
至於XX係幾多，為又南個車牌着想，不便公開，只可以話你聽夠買25份《蘋果日報》。
文：嘴嚼爺
攝影：周旭文
髮型：[email protected].
儍仔變高手
拍緊《一代宗師》嘅黃又南，駕着棍仔AudiS3嚟到，「我鍾情棍波車，覺得全部嘢都係自己操控晒好啲。」考到牌即揸CivicEK3，再換S3揸咗5年的又南話：「𠵱家啲加減波都好快，改好啲個Brake，難聽啲講，真係儍仔都變高手。」有要求有研究，因為佢曾經係志願當賽車手嘅小朋友，細細個就聽過杜漢、史雲斯（九十年代電單車賽車手）個名，「可能係爸爸鍾意車感染到我。佢好多車，又Fairlady又電單車，我細個都立志要做電單車賽車手。十幾歲就跟啲朋友去車房吹水，又有朋友係車手，一路教我玩，所以都好鍾意研究。」因而亦對全線車系皆棍波嘅蓮花有好感，「我以前落Track試過架好舊款，無風油軚，水箱仲喺大髀側邊『辣』住，覺得佢輕得嚟快」
斷手，斷埋飛車癮
睇佢個款，似飛型車手，「唔快喇，大個咗錫身咗。自從之前意外俾玻璃門夾斷手後，真係驚受傷。斷手咁簡單都要半年先康復，拍戲、工作全部要停。揸快車快只係快幾分鐘，但又要冒住俾人影相俾人拉甚至受傷嘅危險。」嘩，曾經滄海咁款，「落過場試過真正嘅速度感，喺街度都唔會再想揸得快。落場轉彎都唔驚有人突然出嚟吖，但係喺街，你隻腳都係要放喺個brake上面。」
開篷上車快
又南跳上Elise第一個感覺：「開篷好，上落車易好多。如果硬頂，真係要練過上落車先敢揸出街。」未等我問佢第二個感覺，佢已經「呃」一聲開車走咗。10分鐘後，我又聽見「呃」一聲甩尾聲，又南返到。攝影師塊面有啲青：「你你你睇吓啲相得唔得……」果然，21ps馬力推870kg車重，0-100km/h4.6秒唔係講笑，有技術根底嘅又南都唔同我講笑：「Supercharger度力好好，我見佢二波再去嗰度力都好夠。個Brake好好，可能條胎靚，無想像中咁甩。頭先我做個Heel&Toe都好順，個極力子好敏感，類似Racing嗰隻。佢個避震幾硬，不過比我預期中舒服。」
喂！原本車價70萬3千，𠵱家酬賓價有九折，可以落埋訂喎。「得兩個位唔會啦，我鍾意載屋企人。」載屋企人？「咁我不嬲揸車都斯文嘅，哈哈！」哈哈？
LotusEliseSC規格
引擎：1,796c.c.直四supercharger
馬力：218ps/8,000rpm
扭力：21.6kgm/5,000rpm
售價：$703,000（現有九折）
查詢：RichburgLotus（28770810）