一年一度的無綫台慶《萬千星輝頒獎典禮2008》將於下月15日舉行，徐榮憑處境劇《同事三分親》的裘俊一角，去年已獲提名男配角，不過最終被《溏心風暴》的阮兆祥擊敗，今年徐榮再憑《同》劇獲提名最佳男配角和飛躍進步男藝員獎，面對《溏心風暴之家好月圓》一眾強勁對手，得獎與否仍是未知之數，但肯定的是，徐榮已憑裘俊一角捱出頭來。
談到今年對得獎是否有信心，徐榮不諱言直到這一刻依然心情平靜，他說：「知道再有機會被提名，而且仲多咗一個，梗係覺得開心，信心一定要有，但係我唔知有幾大嘅攞獎機會，我諗要留番畀觀眾決定，入得圍嘅都係好戲之人，個個都咁強勁，真係好難講，我有份提名已經好開心，覺得係公司對我嘅肯定同認同。」
路人甲浮沉多年
徐榮於1999年參加第13期無綫電視藝員訓練班入行，同期同班還有當紮的楊怡和林峯，若不是因演癡戀上司江欣燕的裘俊一角跑出，或許他至今仍是路人甲乙丙丁，主角背後的佈景板，面對過去的不如意，徐榮坦言曾有轉行的念頭。
徐榮說：「嗰陣我都有諗過轉行，事實上又好似等咗好耐都未有機會，但係每次想轉行嘅時候，梗係有人搵我開工，雖然戲份未必會好多，不過事後覺得好似又有啲機會喎，所以每次做完之後又會諗，不如留多一年半載睇定啲再算啦，況且走咗出去又可以做啲乜？學歷又唔高，加上習慣咗呢行嘅生活，朝九晚五生活唔啱我，喺得呢行發展嘅人大家都係鬥耐性、鬥韌力。」
眼見同期同學如林峯等人機會接踵而來，比較似是無可避免的事，徐榮也坦言雖為他們跑出而開心，但心裏始終有「揦住揦住」的感覺，他說：「心入便有多少唔舒服一定有，我當時都會諗有邊度不足做得唔好，但係有比較係好事，有競爭都係好事，所以𠵱家有機會就努力追。」
感激妻子作後盾
若說《同事三分親》是徐榮事業上的轉捩點，《火舞黃沙》中的閻國基一角，某程度上也可算是他初露頭角之作，徐榮直言感激該劇監製戚其義提攜，他說：「阿戚對我喺演戲上嘅影響好深遠，佢話畀我知做事要有心力，要俾人感覺你好想去做嗰樣嘢，人哋就會幫你，我哋仲會成日研究劇本，我喺佢身上真係學到好多嘢。」
徐榮又表示另一個要感謝的人是其太太，在她的支持下，徐榮可無後顧之憂地發展事業，難怪他自言目前真的很幸福，他說：「好多喺後面做緊戲嘅人都好勤力，佢哋都有才華同演技，我諗個個都想企喺前面，但我真係好彩，先後遇到戚其義、羅鎮岳監製同珍姐（曾勵珍），所以我會更加珍惜機會。」
撰文：何慧斯
攝影：陳順禎
人物誌：入行9年多演閒角
現年34歲的徐榮，與林峯及楊怡一同畢業於1999年第13期無綫電視藝員訓練班，其後加入無綫成為合約藝員。多年來雖然演過不少劇集，但他多是飾演一些行行企企的角色，直至06年憑劇集《火舞黃沙》中飾演閻國基（國基叔）一角，才嶄露頭角，同年8月播放的電視劇《刑事情報科》中，他飾演情報科歐Sir更備受注目，翌年參演處境劇《同事三分親》，飾演江欣燕的癡心跟班裘俊，令他人氣急升。
最佳男配角提名名單
徐榮 《同事三分親》
歐錦棠 《同事三分親》
郭政鴻 《野蠻奶奶大戰戈師奶》
黎耀祥 《秀才愛上兵》
秦沛 《和味濃情》
馬國明 《太極》
李思捷 《原來愛上賊》
周驄 《溏心風暴之家好月圓》
梁烈唯 《尖子攻略》
羅仲謙 《尖子攻略》
飛躍進步男藝員提名名單
王祖藍、李思捷、徐榮、郭政鴻、梁烈唯
資料來源：無綫電視