香港地養細路認真貴，唔少父母成日呻，養個細路仲貴過養自己，呢一點連海外人士都係咁話。滙豐向旗下分散喺四大洲嘅2155個海外僱員做咗調查，睇吓喺海外住同埋做嘢嘅家庭，養兒育女時有幾大挑戰。結果發現，喺咁多個地方當中，香港係第三個養育子女最貴嘅地方，至於排第一嘅係英國，有85%喺英國嘅海外僱員認為喺英國養兒育女費用高昂。
咁邊度最平呢？答案係西班牙、印度同中國，喺呢三個地方嘅滙豐海外僱員中，分別有55%、50%同50%覺得喺現居地養兒育女嘅費用，比原居地少。
競爭力唔及人
除咗養育成本，為人父母，最緊張係小朋友可唔可以健康成長。有三份一嘅海外僱員認為，自從成為海外僱員後，其子女花喺讀書嘅時間比以前多，喺印度嘅海外僱員子女，有67%花喺讀書嘅時間比以前多，其次為法國同新加坡。
至於語言，喺歐洲住嘅子女，識得多啲語言，喺西班牙就有94%海外僱員子女識得兩種以上語言，相反喺新加坡同香港，識得多過一種語言嘅分別只有21%同22%。你話香港係咪唔適合養兒育女嘞！