昨日港股跌勢加劇，成交額增加，而外圍市況繼續不濟，新興市場印尼更跌停板；嘉賓指現時要全球集體大幅減息，經濟才有機會復蘇。
孫：主持 孫柏文
碩：亨達集團研究部董事 黃敏碩
聰：荷蘭銀行股票衍生及私人投資產品部董事 何啓聰
孫：恒指單日跌千幾點，印尼更加要跌停板，究竟股市要幾時先有轉捩點呢？
聰：唯一令市況轉勢嘅方法就係全球集體大幅減息先可以振奮到股市，而當利率低到有人肯拎錢出嚟借時，就有振興經濟作用，不過要見效都需要一段時間。由於短期救市措施可以出嘅都已經出晒，所以企業盈利未來都仲會倒退，市場沽售情況亦會嚴重。
碩：大家都擔心經濟繼續下跌，大家都借呢個消息掟貨。就算金管局降低貼現窗利率，市場上同業拆息都係依然居高不下，亦有資金俾人抽走緊，所以證明降低貼現窗利率效益不大。
黃小姐：今日（周三）0.78蚊買咗隻首長國際（697），想問吓呢幾日有冇得升呢？
經濟轉壞 首國恐捱沽
碩：經濟唔好，鋼材需求或降低，內地鋼商又繼續減產，所以我都唔太睇好。
聰：𠵱家經濟前景唔係咁樂觀，呢隻股份可能仲要捱跌一段時間。
冼小姐：天工國際（826）一路跌落嚟，但嗰陣又冇止蝕，買嗰陣成11蚊，𠵱家得番2蚊，究竟呢隻股票仲值唔值得揸落去？
基本因素差 天工睇淡
碩：呢隻工業股，競爭力又唔係太強，我就唔太睇好。就算後巿反彈，佢嘅反彈幅度都唔會太大。睇埋佢之前個中期業績，盈利雖然只係跌咗14%，但係主要都係靠啲非經常性收益撐住，所以佢基本因素我唔太睇好。
今日嘉賓
click入 http://finance.appledaily.com以webcam參與節目及收看
歡迎phonein28698262暢談心得亦可email至mailto:[email protected]搶先貼股
