上期推介喜伯年坐和望贏，結果作客2:1贏埋鴨巴甸，重心客勝中到嘭嘭聲，〈早飛倉〉亦兩連勝。趁住拍檔牛兄外遊未返，今期都係由畢傑做主打；呢個禮拜國際賽檔期唔係我強項，我揀番巴甲賽事，要戈亞斯主場踢爛國際體育會個生招牌！
第8位嘅戈亞斯（43分）同第10位嘅國體會（42分）都爭緊前4嘅南美自由盃資格，照班底秤其實後者仲好少少。國體會歷來專出名將，遠至鄧加及泰法路，近年亦殺出個柏圖過咗AC米蘭搵食；今年更有阿根廷、巴西前國腳廸阿歷辛度同丹尼爾卡維奴加盟，可惜作客差仍然係佢哋特點，今季14戰2勝3和9負便知一二。
國體會鐵三角差一件
無可否認，自「大頭」入隊後中前場生晒，之前4:1大勝甘美奧，佢就貢獻咗一個入球兩個助攻，不過要留意係喺主場比拉里奧作賽。更何況，國體會一向依賴攻擊鐵三角拿菲爾阿歷士、尼爾馬及廸阿歷辛度組織攻勢，奈何拿菲爾阿歷士最近首次入選巴西國家隊，備戰嚟緊對委內瑞拉及哥倫比亞兩場世盃外，故今役一定缺陣。須知呢個進攻中場，今季喺所有賽事幫國體會射入咗25球，冇咗佢加上作客，實力至少減5成。
戈亞斯主場好火
戈亞斯近期為爭踢自由盃着晒火，對上6場5勝1和，若只計主場出擊，更錄得7連勝紀錄。射手伊亞雷同翼鋒施仙奴域陀腳風大順外，另一中場主力保羅拜亞今場亦停賽復出；呢位名將上仗對富明尼斯前，3戰入3球。唔好忘記，榜首彭美拉斯暫以32球為主場入球王，戈亞斯都喺主場入咗31球排次席，就知塞拉杜拉達球場有幾勁！
上期命中重心，但過關飛斷咗，今期決定將注碼重槌戈亞斯W；足智彩雖暫未開盤，但海外莊家開出主W為1.9倍，似開[-1]居多，過關則少注試一試。
〈早飛倉〉
主菜：星期六40戈亞斯勝（待定）@2,200
渾水摸魚過關：星期六9修安聯勝（1.8）x星期六38帕拉尼恩斯大（待定）星期六40戈亞斯勝（待定）3x1@300
今日早餐價錢：-$2,500
上日賺蝕：$20
早飛倉結餘：$92,135
規則：$100,000本錢，每日買早餐最多動用$5,000，最少$1,000，逢周二、五起身食早餐。
周末早飛超級重心
星期六9 修安聯勝（1.8）
修安聯聯賽4連勝，史托港則剛在英錦標強陣下負貝利，更有隊長加里夫奧雲續受傷缺陣，1.8倍W筍。
星期六38 帕拉尼恩斯大（待定）
帕拉尼恩斯與富明尼斯分處16及19位，為護級必搶攻不求守，何況富軍作客13戰開10「大」3「細」。
星期日4 厄瓜多爾勝（1.85）
厄瓜多爾往績一面倒，已入選陣容包括路爾斯華倫西亞及沙根度卡斯廸路等英超兵，實力勝智利。
難啃早餐
星期六4 挪威勝[+1]（1.67）
即使蘇格蘭入選的陣容頗強，又有主場之利，但麥法頓及費查等主力未在佳態，讓唔起穩打穩紮的挪威。