股神畢菲特嘅少年時代，同時下青少年一樣，都經歷過反叛期，少年畢仔唔單止成為老師心目中嘅問題學生，仲學人偷嘢。畢老喺自傳坦言，慶幸父母從來都冇放棄佢，對少年股神嚟講，冇一樣嘢重要得過得到父母嘅信任。結果喺爸爸侯活感動下，少年畢菲特終於「改邪歸正」。
話說初中時，少年畢菲特誤交損友，仲群埋班壞同學仔，聯群結隊走去Sears百貨偷嘢，先後偷走過百個高爾夫球、球袋同球桿。少年股神偷嘢唔係因為冇錢使，只係出於少年反叛心態，佢偷偷埋埋百幾個高爾夫球全部放喺屋企櫃桶，冇拎去變賣套現。當時佢仲呃老竇侯活，話啲高爾夫球係同學爸爸過身後送畀佢。老竇侯活梗係唔信啦，只係冇即場踢爆。
除咗偷嘢，少年畢菲特仲係問題學生，成績退步不特止，由於佢唔肯打呔兼着整齊校服出席畢業禮，搞到俾校長禁止佢同同學仔一齊參加畢業禮，當時唔少老師都批死少年股神將來冇前途。
父親失望表情打動畢仔
最後侯活忍無可忍，喺升高中時落最後通牒，軟硬兼施，威脅唔畀少年畢菲特派報紙賺外快，截佢收入來源，同時又好言相勸，希望佢發揮本身才能。當時侯活冇大聲責罵，只係流露失望之情，爸爸唔係要求畢仔做足一百分，只係希望佢唔好將才能埋沒。畢老家陣仲牢記爸爸一番語重心長嘅勸導，亦係因為爸爸呢番失望之情，卒之打動少年畢菲特重歸正途。
（第五集）