蘇永康11月在StarHall舉行三場演唱會，由東亞銀行贊助，他早前被許志安踢爆在東亞銀行擠提當日，把所有存款提出。康仔昨日強調從沒提款，直指安仔患上思覺失調，並謂事後安仔已向他道歉，說了超過30次對不起。
蘇永康昨日在九龍站一酒店舉行「SOISING08LIVE」演唱會記者會，他將於11月14日至16日在九龍灣StarHall舉行一連三場演唱會，由東亞銀行贊助。
「佢打畀我道歉」
早前東亞銀行擠提事件全城哄動，康仔被老友許志安踢爆第一時間到銀行將存款全數提走，昨日提及此事，康仔說：「都話冇囉，許志安思覺失調啫，事後佢都有打畀我同我道歉，仲講咗30幾次對唔住。我唔會嬲佢，都唔會影響我哋20幾年嘅兄弟情，不過發生咗呢件事之後，我哋都冇見過面，只係通電話。」
康仔昨日在記者會上切燒豬，並與黃栢高簽一份「永遠栢檔」的合約，林海峰在台上透露康仔是他在圈中認識的第一個朋友，他說：「當年有次喺夜店撞見康仔，佢同我講話佢失戀，我覺得好奇怪，個外形咁嘅質素都會失戀。」林海峰問康仔會否邀梁漢文做個唱嘉賓，他笑說：「睇吓佢啲嫁妝搞成點啦。」問他會否在演唱會上宣佈婚訊，康仔坦言：「唔好喇啩，我怕有反高潮喎。」
康仔表示是次演唱會將以享受心態來面對，音響會做到最好，他說：「因為我演唱會冇dancer，冇爆破，全部成本會放喺音響上，側田七場嘅製作費，等如我做三場嘅製作費，今次應該都唔會有嘉賓，難得可以自己擁有一個舞台。」
為梁漢文頂酒
梁漢文結婚，康仔會做兄弟，他說：「做乜都得啦，一定要同佢頂酒，希望佢可以洞房花燭，咁先圓滿㗎嘛。」
另外，康仔前晚到會展欣賞音樂會，問他如何教梁漢文夫妻相處之道？他說：「叫佢唔好做一啲我做過嘅嘢囉。」問他何時迎娶女友，他說：「𠵱家好好，兩個人一齊唔一定結婚。」
採訪：胡比
攝影：仇志德
