自從股海翻波，啲股神、專家都冇乜再出嚟講吓個市，大家喺呢個大海嘯中幾乎奄奄一息，仲邊有心情出嚟「講股」呢？不過呢個巨浪掩至全球，牽連太廣，連教宗本篤十六世都關注到，喺梵蒂岡召開第12屆世界主教會議期間，出口救市──其實應該話拯救人心至啱。
美國衰退 捐款料減
前日教宗首次發表咗對呢次金融海嘯嘅睇法，佢總結一句：錢係會煙消雲散，冇乜大不了（moneyvanishes,itisnothing）。據《自由時報》報道教宗喺接受意大利一名記者採訪時，提到梵蒂岡亦有留意金融海嘯，佢話人唔好只係追求成功、事業同金錢，就好似喺沙上面起樓，好唔穩陣。當大家睇到雷曼迷你債券啲投資者，一夜間所有財產化為烏有，相信都好有體會。
咪以為教宗睇得開係因為唔關佢事，其實教廷嘅資產，上年都有損手。今年中，教廷公佈去年財政，3年嚟首次見紅，由前年240萬歐元（2538萬港銀）盈餘，變成910萬歐元（9625萬港銀）赤字。其實教廷財政都跟隨世界經濟起落，根據彭博報道，90年代全球股市大豐收，加上美元強勢，教廷財政亦受惠，但03年度財政，就同07年度一樣，受大圍經濟拖累見紅。
教廷嘅資產會受油價升、通脹，特別係美元弱勢影響，因為教廷每年都收到由四方八面天主教徒送嚟嘅捐款，主要都係美元做單位，單係美國上年就捐咗1900萬美金（1.48億港銀），但梵蒂岡嘅開支主要用歐元，即係收到嘅捐款打晒折扣。家陣美國步入衰退，未來嘅捐款會有幾多？真係好難講。
李華華
mailto:[email protected]