新一屆立法會開鑼，呢個政治舞台未來四年好戲連場，噚日先上演花生騷，唔少議員都悉心打扮盛裝出場。葉劉選舉時獲形象顧問指點，努力洗刷「掃把頭」形象，豹紋、黑超絕迹，噚日恤個新髮型亮相，穿一套白色套裝襯珍珠頸鏈、耳環宣誓，造型四平八穩，最矚目係手上一隻鴿子蛋咁大粒嘅珍珠戒指。
鼠王芬同葉劉撞色
無獨有偶，「鼠王芬」梁美芬竟然同葉劉疑似撞衫，都係着白色套裝登場，款式同闊太至愛C字頭名牌類同，最巧合係都有一大串珍珠傍身，鼠王芬件外套有珍珠綴邊；同葉劉一樣，打扮穩陣大路，冇乜驚喜。公民黨陳淑莊同黨魁余若薇都係着深色闊領上衣，睇落好似夾定，真係好姊妹；李慧琼係民建聯唯一女議員，噚日着件黑色孖襟外套去立法會，件衫勝在有啲款式，美中不足係整體打扮略為太平淡，冇乜特別。
議事廳有議員宣誓騷，公眾席亦有個稀客，白姐姐戴住頂帽坐喺度睇住男友謝偉俊宣誓，佢哋兩個以前不時有令人拍案叫絕打扮，噚日造型卻十分低調，白姐姐話特登幫阿Paul揀咗個Cheetah獵豹襟針，因為豹係獨來獨往嘅動物，同阿Paul唔受其他黨派牽制嘅獨立議員身份襯到絕。
詹培忠曾建議阿Paul少帶白姐姐出席公事場合，白姐姐噚日話其實佢對於睇議員宣誓都冇乜興趣，本來留喺屋企睇美國總統候選人辯論，但阿Paul好想佢見證歷史時刻，佢先勉為其難露面。
女議員刻意打扮，男議員多數係西裝一道，社民連毓民同陳偉業都着咗件紅色黨衫宣誓，長毛冇跟大隊，亦冇着哲古華拉頭像T恤，而係着一件印住「平反六四」字句T恤，佢唔單止喺誓詞中玩嘢，造型亦別樹一格，戴埋條印上「人民萬歲」頭帶，即刻搶晒鏡。毓民係唯一以普通話宣誓議員，佢話希望內地同胞都聽得明佢宣誓時講乜。
會計界議員陳茂波武士復仇終於當選，唔單止一雪前恥而且光宗耀祖，噚日幾乎闔家統請到場，太太、兄弟姊妹都有嚟睇佢宣誓，睇得出佢成家人都好歡喜，好似去飲咁高興。
mailto:[email protected]
