日頭猛做，耷低頭就做，賺埋雞碎咁多，既要俾老闆媽叉，又擔心手停口停，你幾耐未真心笑過？嗱，玩呢個估明星笑容心理測驗，Check吓自己開心指數，你畀得六皮買呢份報紙，都想你睇完笑住掉入垃圾桶。放鬆啲啦香港人，做人唔識笑，執到金都唔開心啦。
記者：王震遠、周靜雯
（設計對白）
1.「過咗去嘅唔好講嘞，我一啲都唔儍，邊得閒理個有錢仔呀，我仲要殺入荷李活做大茄㗎。」
2.「希望拍檔復出，自己接晒Job，無假放好耐嘞。」
3.「見過鬼仲唔怕黑？打死唔着T-Back，小心綁緊褲頭，我先敢再上東華做慈善Show。」
4.「年頭開演唱會，染一頭金毛，晒胸露腿，家陣人人當我係潮媽，岑建勳都俾我玩死。」
5.「我發誓，我堅持，我戶口真係得番$58，我話喊就喊，你吹得我脹咩？你得咩？」
6.「唔該啦，咪淨係留意我對導彈啦，真㗎，扮『噴血版孫尚香』，都要幾分演技㗎。」
7.「𡃁界女神？虛銜嚟啫，邊搵到銀両呀？拍戲先有錢㗎嘛，我想拍戲呀。」
8.「我有對大眼睛，我有長腿，我有後台，好姊妹，你唔羨慕得咁多㗎嘞。」
9.「估唔到我結婚都會上頭條，老公一日唔戒煙，一日都唔好旨意同我造人。」
10.「我最Buy『佐記』啲黑色衫，好姊妹呢排激嬲我，我唔Like，有啲笑唔出。」
11.「嗰幕呀，我真係俾Sa姨追住打㗎，痛到我死，希望台慶有獎攞啦。」
12.「無對白唔緊要，其實學識手語都幾好，至少觀眾肯注意我演技。」
13.「啱啱同農夫開完演唱會，我要Rap埋玲玲姐嗰一段，都OK難喎。」
14.「人人話我靚，讚我有演技，梗係啦，我唔係花瓶，我係靚阿嫂。」
15.「過馬路要小心，明明綠燈轉眼變成紅燈，我其實想做小女人。」
16.「好姊妹？乜好姊妹呀？我唔識呢個人喎，邊個佢呀？都唔知你講邊個。」
17.「無搭電梯好耐啦，家陣我買嘢，四折都唔鍾意，只鍾意『六折』㗎咋。」
18.「~Ayumi，並未像我吧；容祖兒，並未像你吧；何超儀，並未像我吧~」
19.「我同軒軒都係唱作歌手嚟㗎，我把聲，係一級靚聲，我同佢好夾㗎。」
20.「壓力大咪拖地減壓囉，又無得罪人，日拖夜拖又關你班狗仔隊乜事呢？」
21.「餅碎中最唱得係我，最跳得又係我，使乜賣樣啫？呢個世界講實力㗎。」
22.「我講嘢無厘頭？我無內涵？唔覺喎，我做《筋肉擂台》，收視都不知幾好。」
23.「我拍ETV得，Rap又得。𠵱家大把人當我偶像，舉高隻手，使乜怕醜~」
24.「喂，搵命博㗎，我個演唱梗係賺到笑啦，我出嚟選特首，一定贏㗎。」
25.「做好套老西啦，如無意外，應該同荷媽夫妻檔一齊拎男女主角獎啦。」
26.「為咗夢寐以求嘅男主角獎，同Jo飽爭都無計，兩父子都無情講呀。」
27.「股市咁差，都係唔好渣沽喇。話我黑馬會唔會睇小咗我呢？我大熱啦。」
28.「我唱歌夠浮誇，扮倫伯唱歌都有一手，老婆阿女又夠潮，係老竇唔生性啫。」
29.「思前戀後，我同『瘦胃』無嘢㗎喇。知不知對你牽上萬縷愛意~」
30.「仲獨家十分最愛同麗欣合作？呢啲煲水新聞，Out唔Out啲呀？」
答案
分析
估中25-30題
你係個百分百開心果，成日四萬咁口，見到人笑自己會笑，搵你拍《笑聲救地球》無衰。Keep住樂天心境啦，繼續天跌落嚟當被冚啦。
估中19-24題
聽到爛Gag你會盡情笑，但遇到不如意事又會揦埋口面。不過好彩，你懂得釋放自己，唔開心就會約三五知己飲嘢吹水、睇套王晶爛片，令自己開心番。
估中13-18題：
一半沉鬱一半樂觀係你性格寫照，你會笑，但笑得唔盡情；你唔算悲觀，但唔係個個笑話都引到你笑。放低嚴肅性格同古板面孔，學吓會心微笑啦。
估中7-12題：
你向人歡笑背人愁，就算笑，都係陪笑、苦笑、無奈咁笑，一般爛Gag根本引唔到你笑。你要學習點樣疏導負面情緒，建議翻睇張家輝嘅笑片，笑個飽啦。
估中1-6題：
你牙骹太硬唧都唔識笑，腦細胞充斥太多負面嘢，行街都驚跌個招牌落嚟責死你，咁又點會開心？放低鬱結心情，對住塊鏡慢慢訓練笑容，你會發現開心果從來無遺棄過你。
