《蘋果日報》（十月二日）A24版有一個全版廣告，係RBS刊登嘅，呢版廣告有幾國文字，我哋只識睇六個中文字，就係「開創更多領域」，其他文字究竟講乜，與肥仔K研究吓，肥仔K話Hanhdong似係越南話「行動」，韓文亦係行動，日文嘅意思係action（行動），至於其他語言就唔識咯，但有一個英文字母拼埋嘅字Kaganapan，以為係菲律賓「泰加洛」語，於是問菲傭，菲傭話：「如果係泰加洛語，就係罪案（crime）咁解，但或者係印尼話呢，咁就唔識咯。」啋，賣廣告冇理由出現crime呢個意思嘅字嘅啫，相信Kaganapan係印尼話啩。
既然外語係「行動」，為何中文主旨竟是「開創更多領域」，睇廣告信息竟然令讀者摸不着頭腦，廣告創作人要諗吓，讀者往往唔夠佢哋咁聰明，佢哋不妨記住肥佬黎金句：「不扮高深，只求傳真！」
但係「傳真」有時冇咁易，譬如有啲年青文化評論員寫流行文化評論，左丁山就睇唔明，即使努力閱讀，唔理文章內好多專門用語（jargon），純睇其他中文，仍然睇到一頭霧水，為何寫文章寫得如此麻煩？唔通佢哋覺得李純恩式文體太過簡單，唔夠高深，反映唔到佢哋嘅「文化認知」與深度？
唔好以為左丁山落後，追唔上時代，實則文字、文章呢回事，寫得越簡單越好。啱啱收到《香港文學》第286期（○八年十月號），內有中大黃國彬教授所寫之「約翰與保羅」，睇題目以為大教授講耶穌門徒，誰知不然，文章細述披頭四樂隊嘅約翰連儂與保羅麥卡尼，講流行音樂扯上莎士比亞、葉慈、艾略特，娓娓道來，不用艱深字，不引用全世界都唔明嘅理論，睇到左丁山眉飛色舞。嗱，真正高手寫文章係咁嘅，好淺白㗎咋，今期《香港文學》啲名家示範，還有西西、北島、也斯、劉兆銘、蔣芸、王良和、余光中等等。每月捧讀《香港文學》，必有所得，可為自己增加文學營養。