𠵱家啲香港人越嚟越識享受，屋企唔單止設有家庭影院，薄平大電視、數碼廣播解碼器，再駁埋5.1聲道AV擴音機同DVD機，喺屋企無論睇戲睇電視都聽到嘭嘭聲。𠵱家仲好興「影音分家」，即係將AV擴音機用嚟睇戲，另添置兩聲道擴音機加獨立CD盤嚟聽歌。
可將音效適當發揮
小藍膽粗粗最近學人影音分家，買咗部CD機加兩聲道膽機，再買多對書架式喇叭。噚日試機，播發燒天碟陳潔麗啲歌，音質真係靚咗好多，人聲甜美突出之餘，樂器層次分明。小藍轉番用AV擴音機播放，同一隻碟，啲聲平淡咗好多，唔夠立體感。
影音專家Alan話，𠵱家真係多咗人影音分家，如果講到頂級數十萬元嘅AV擴音機家庭影院，用嚟聽歌一樣咁靚聲，但講緊一萬蚊樓下嘅音響器材，影音分家啲聲真係靚好多。佢解釋道，AV擴音機注重音效，即係話睇戰爭片，可以發揮到子彈橫飛嘅效果；兩聲道擴音機則講求音質，如果用膽機，啲人聲仲好甜好溫柔㖭。所以好多發燒友都好想影音分家，但最大問題係屋企地方細，擺唔落兩對喇叭，折衷辦法咪將一對喇叭兩套機用，每次插喇叭線囉。
話時話，早幾日小藍去咗油麻地MK1超級數碼廣場悅昇多媒體昅昅，睇吓有乜新膽機，老闆周革生話，因為業主加租兩三成，所以做埋呢個月就搵地方搬，下禮拜會清貨減價。有興趣嘅朋友咪去睇吓有冇平貨執囉。
逢周五刊出