只出過一代，已經攞盡全球五十幾個獎，兼且賣車超過二百萬部嘅Jazz，成近年人氣熱賣車仔，個個貪巨的骰又巨肺，阿女又舞得掂。新一代Jazz終於到港，好多舊車主昅到實準備Upgrade新車。大變身後最厲害係個超大擋風玻璃，又闊又斜，視野範圍大大增加，頭頂空間又夠高，令到成架車開揚感十足，成功踢走細車內櫳侷促嘅必然缺點，抵讚！
專攻小家庭，即係要打師奶客，車內增設多個鬼鼠置物位，多多唔等使嘢都擺得落，掀起座椅，居然連凳底都有隱藏位畀你擺嘢，飲品架更多至10個，呢部車簡直係師奶殺手。
i-VTEC偈爆得起
新一代Jazz車身加長咗，比舊款Size稍大，無錯乘客會坐得舒服啲、行李又擺多啲，不過相對馬力要求會高咗；好在Honda都換番副新一代i-VTEC偈落去，雖然都係1,300cc，不過馬力就去到100匹，配合Drive-by-Wire系統，低轉高扭表現更強勁明快，仲有個5前速加減波箱，興之所至走番轉一樣得心應手。
諗到想要嘅配套，新Jazz都差不有晒，預售價$149,800，又係劈價搶客，代理話家陣出車要等到12月先有車交，想新年揸新車，快手試車喇。
記者：徐影龍
攝影：陳盛臣