女人總喜歡透過喊發洩情緒，女星們上演幕幕哭成淚人嘅場面，可憐？未必！一哭二鬧三上吊，自古係女人發爛渣手段，但女星扮喊，喊完後老奉偷笑，我哋又未必知啫，不過不論真哭定假喊，喊的確係女人減壓良方。袁彌明仲勁（Erica），親身示範15秒快速谷淚法，但提醒各位靚女：「女人眼淚好矜貴，流一次平一次呀。」
記者：許維雅
攝影：王文忠、譚盈傑
女仔愛哭係事實，扮哭都係絕招，Erica用15秒就谷得出真眼淚，都咪話唔勁，「喊係好好嘅減壓方法，就好似傷風擤鼻涕一樣，通一通舒服好多。」Erica話：「我認為，對住男朋友喊都要講道理，大炒大鬧嘅喊好任性，遲早會散。」
觀眾眼中的明星淚統統是戲子淚，究竟孰真孰假？「我咁睇啦，其實發生乜事都好，要喊喺屋企都喊晒啦，不過女星都有喊嘅必要，因為有時眼淚係一種交代，記者要你交代指控，逼到埋身唔喊唔得。」
喊一次平一次
眼淚當手段，Erica見過唔少，話說當年選港姐要拍災區特輯，「我選港姐嗰年發生大海嘯，要拍好多慈善特輯，我親眼見到有啲港姐見人喊先自己喊，因為有鏡頭影住。」為乜呢？「因為𠵱家啲觀眾好Harsh，拍戲、唱歌又唔賣錢，惟有用八卦新聞增加曝光率，用眼淚博見報，全部眼淚都係真嘅，問題只係動機。我覺得言行要忠於自己，攞獎想喊咪喊囉，唔想喊咪笑囉。用眼淚當手段，只會狼來了，眼淚好矜貴，第一次會覺得你慘，喊多一次平多一次呀。」
Erica講完，到臨床心理學家葉妙妍發表意見：「喊，係自然生理現象，不論男女，承受壓力嗰陣都需要喊去宣洩，病人喺我面前都成日喊，我盒紙巾用得特別快㗎。至於藝人面對傳媒喊，我唔會推測動機，但無可否認，女仔有時會選擇喊作為解困或落台嘅辦法。」講緊嘅都係同一條簡單方程式──扮完喊，成功見報，之後咪可以偷笑囉。
明星真人Show
阿嬌：喺TVB藝人聲討尊嚴大會上，哭訴明星私隱被侵犯。Erica評：「搞到咁大單，所有演藝人都撐佢，佢唔喊唔得，換轉係我都會唔開心，嗰刻承受多方壓力，一定要喊。」
江若琳：被指搶人老公，頻頻成為封面人物，淚流滿面大反擊。Erica評：「俾人屈係第三者，我會鬧番佢轉頭，但佢形象唔可以咁做，惟有靠喊。嗰個喊晒口封面，我覺得似同傳媒夾定嘅，可惜多咗本紅簿仔，成件事𤓓晒。」
張栢芝：除初出道嘅姦殺令事件，之後亦試過多次情緒失控，喺公眾場合喪喊。Erica評：「栢芝大情大性，性格率直，大家都會信佢係真喊。」
關心妍：為爭寵事件喺音樂會上喊，有傳記者影唔到相，佢即場喊多次畀記者補影。Erica評：「呢個唔講啦，咁Out。」
裕美：演唱中途失聲，自責落淚。Erica評：「藝人面對傳媒搵下台階，喊係無可避免。」
李彩華：接受訪問，談及為父還債喊到出面。Erica評：「自己都試過接受《壹週刊》專訪嗰陣喊，嗰次我嫲嫲啱啱過身，有時記者問到親人嘅事，會忍唔住喊出嚟。」
周麗淇：05年萬千星輝賀台慶，上台領獎喊極都唧唔出眼淚。Erica評：「領獎喊定唔喊，上台前已經諗定，Hold到Moment臨場發揮，時間配合到咪真囉，呢種眼淚一定有思考過。」
15秒谷淚
聽歌醞釀情緒，擠出欲哭表情，15秒開始眼紅紅水汪汪，叮，有料到嘞。
成功流出眼淚，受地心吸力下流到面頰，洶湧澎湃，勁。
Keep住培養情緒，眼淚可以源源不絕，要幾耐喊幾耐。
扮喊三寶
1.聽慘情歌：「拍喊戲，我會匿埋一邊聽以前失戀聽過嘅情歌，自己同自己傾偈：『點解離開我？點解話我係第三者？』為自己製造悲苦情緒。」
2.搽白花油：「拍劇喊唔出，有人會用白花油刺激雙眼，喊完之後唔會眼腫，但要呃人嘅話就唔多掂，因為易俾人識穿。」
3.滴眼藥水：「眼藥水當眼淚呢招好常見，要駁戲又唔想眼腫多數用呢個方法，不過眼藥水流兩滴已經無貨賣，可信性較低。」
街訪：扮喊明星江若琳稱冠
訪問一眾男女意見，大部份人都狠批明星扮喊；但一問到自己會唔會用眼淚對付男友，就個個都唔多想認。
問題
1.唔計做戲，邊個明星喊得最假？明星面對傳媒喊，有幾多成真？
2.（女）10次有幾多次喊係撒嬌，有示弱求勝成份在？（男）覺得女朋友喊，10次有幾多次係假？
3.女仔喊，係咪一定有人可憐或者令人買佢怕效果？
1.江若琳。我覺得只有2至3%係真。
2.我信女朋友或者身邊女仔，喊得都係真嘅。
3.我會可憐女仔喊，但只限女朋友，佢一喊就怕咗佢。
1.江若琳日日對住傳媒喊，我唔信係真。頂盡2%似真。
2.我喊親都堅㗎，無可否認有少少撒嬌成份。
3.唔多唔少都有啲作用。
1.江若琳。次次都係假，得2%係真。
2.我唔開心先會喊，不過我都覺得女仔喊，唔多唔少都係想對方買佢怕。
3.我覺得Work。
1.阿嬌最假，成日喊有鬼人信咩？我估得50%係真。
2.好少女仔會當手段用嘅，不過10次總有1次扮喊。
3.有用㗎！見到佢哋喊，都會怕。
1.阿嬌。我估得30%係真。
2.多數都係真㗎，講到話向男朋友撒嬌，10次大概有2次啦。
3.我覺得喊真係Work㗎，女人眼淚，可以殺死人。
1.Yumiko似最假。明星喊親都似假，得2%係真。
2.女仔或者女朋友喊，我都信係真嘅，唔會用喊嚟威脅我咁衰啩？
3.女仔喊我都怕㗎，不過只限女朋友。
1.阿嬌最似扮嘢。30%真啦。
2.10次有2次扮嘢啦，但我都係唔開心先喊啫。
3.喊有時都OK有用㗎，不過明星喊，我就唔係幾信嘞。
1.江若琳。全部都係假，除非屋企死人啦，咁就真嘞。
2.我喊親都真㗎，覺得自己慘先喊，唔會當手段用咁衰。
3.女仔喊會Work，對方一定可憐佢。