蘋果體育版昨天難得有半版韋斯咸專題報道，講的不是甚麼好事吧，冰島老細的銀行爆煲了。開「咧」只是短短兩個月，壞事卻接二連三，不能怪傳媒一沉百踩，只能怨禍不單行實在是至理名言；只不過今時今日全球一片財經恐慌之際，「鎚仔黨」周身唔聚財的病況，才真正是你不會獨行，與球迷們搭同一條船吧。
對蘋果的報道只有一點不滿意，藍鑽石說韋斯咸似是當年列斯聯，認真要閘住，當年的列斯聯是老細洗大咗，搞到成身債走佬都唔掂，這邊廂的韋斯咸是老細自己就破產，最壞情況只係會轉手（對球迷們冇乜影響），以及冇錢買球員（對球迷們的幻想空間有影響）……
球壇不能談感情
作為新任領隊，上任以來壞事接二連三，蘇拿大概不必自責是陀衰家，只是卻要堅守一句球會的持家之道──Sellbeforebuy，要買先要賣。其實，作為一家中小型球會，根本上這樣的遊戲規則才是王道，好一點的潛質股適當時機就要放手，韋斯咸原本就是這方面的高手，季初放走安頓費廸南是有點令人意外，但800萬鎊的價錢又卻是可一不可再；球壇如股壇，都是不能談感情的地方，若果有錢銀轇轕的話。
何況，韋斯咸現在其實是人才過剩，雖然有一大堆是放在療養室，萬一好彩的話，全部受傷的球員都能夠復出的話，如何安撫邊個有得出冇得出也已經夠蘇拿煩。
經濟蕭條，其實也非絕路，沒有任何假大空的遐想，打工仔們自然會努力打拼多一點，社會的生產力說不定還提高了。
球會裏，明知1月不會有幾千萬未開頭，自然會好好珍惜利用現役一班球員呢？何況，韋斯咸從來是那種你以為佢贏佢就輸的球隊，被人看扁，反而有利今年爭個歐聯資格吧，哈！
文：馬啓仁