股市喪跌，含住泡眼淚都無用，試吓催眠自己好過：「無嘢嘅，後日會升番，會升番，會升番……」睇得《笑看瘋雲》呢一版，就係想你逆境尋開心。人辦有八両金，步過風風雨雨，生存法則係自我催眠做小丑，扮儍心不儍，人自然開心。
記者：吳允冲
攝影：伍慶泉
協力：許維雅、王震遠
模特兒：TifaIp@StageModels
鳴謝：催眠治療師連峻（25717571）
八両金三大金句
八両金滔滔不絕獨家自我催眠大法，充滿娛樂性亦不乏道理，信佛嘅佢果然言之有物。聽完偉論，對佢印象大改──就算佢唔係隻聰明的烏龜，但都一定係隻愚蠢的白兔。
一、我要做小丑
八両金着自家品牌DXGOLD8，披Biker褸加閃石Tee，咪以為佢扮型，查實佢知道自己同個「型」字沾不上邊，反而樂於做小丑，「喺娛樂圈咁耐，無乜賺過錢。」咁為乜？「帶畀觀眾歡樂，當做善事，我慣做小丑，話我醜無所謂，畀到人歡樂咪得囉。話你知，有次搭地鐵見到對情侶鬧交，個女仔喊晒口指住男朋友鬧：『憎死你，賤人。』喊喊吓望到我，咭一聲笑出嚟，我走埋去同佢講：『我樣衰定你男朋友樣衰呀？你男朋友咁靚仔，鬧佢做乜啫？」講完佢哋就開心番喇，人哋開心，做吓小丑無相干啦。」啱嘅，一身勁爆造型惹來同事勁大笑聲，就知佢所言非虛。
八両金浮沉娛樂圈十幾載，你記得佢嘅作品又有幾多？「從來無人搵我做主角，但做人唔好比較。」佢見慣冷漠，全憑一個「信」字，催眠自己會成功，所以膽粗粗作曲畀陳曉東，又做老闆開劇，近年進軍時裝界，喺深圳開舖賣自己設計的八両金Style時裝。
二、我要做儍瓜
「做靚仔、要發達，呢啲嘢好短暫，計我話最緊要學做儍瓜，唔儍都要扮儍，即係唔好斤斤計較，唔怕蝕底，咁先可以長做長有。」有道理，凡事錙銖必較，你計我我度你又點會開心？「我呀，返大陸做Show兩萬蚊一場，千祈唔好諗點解得咁少，係呀，有人八萬蚊一場㖭呀，但亦有打工仔搵得萬幾蚊一個月喎，話我阿Q精神？我開心喎。」喜劇演員，返到屋企總有不如意事，開唔開心都無人知，「要搵嘢令自己開心，實則啲，千祈唔好諗要中六合彩、媾好多靚女呢啲幻想。就算得到，呢啲開心都係一剎那，要永遠開心，信我，最緊要定下目標，努力完成，做嗰陣記得扮儍呀。」
三、要知足唔可以滿足
開心秘訣，簡單，唔好滿足，但要知足，「我咁嘅樣都有兩萬蚊一個Show，哈哈。我？𠵱家勞斯萊斯都買得起，但我唔需要，我揸Benz，生活開心夠食夠着，唔使大花筒，已經好心足。」表面風光，但感情痛苦同事業低潮卻鮮為人知，「老婆走咗都無得怪。」如果唔識自我催眠，我諗八両金跳咗樓N年。「但做人又唔可以咁易滿足喎，咁易滿足就會懶過鬼，呢個世界就無進步㗎喇。」
同潛意識溝通
雖然只得三年班學歷，但八両金嘅自我催眠金句，同專業意見殊途同歸。「硬要催眠自己中六合彩、變靚仔靚女，呢啲係妄想，生日許願玩吓就得，」催眠治療師連峻建議話：「催眠等於同潛意識溝通，提升自己能力完成理想。要自我催眠，應該先寫『我要精神啲』、『我今日好開心』呢啲容易達成嘅Slogan，潛移默化自己去行動。」
如果目標較大，應該先諗一個實質內容對症下藥，例如：「我每日要跑100米」、「我只食七成飽」，不斷喺腦海重複呢個訊息，控制自己行為，齋諗「我要減肥我要瘦」，一定唔Work。
催眠自己，唔使望陀錶，唔使搵個特別安靜環境，「只要有恒心，24小時Keep住提醒自己，循序漸進，做足以下四式，一定有效。」
錄低慢慢聽
錄低Slogan，行街搭車不斷翻聽MP3，疲勞轟炸，轟到自己煩為止，有實際催眠作用。
紋身警惕自己
岳飛背紋「精忠報國」，唔照鏡睇唔到，要搶眼梗係紋手臂。怕痛唔想傷害自己，印水紙都得。
寫毛筆字
專心寫低目標，人唔會亂諗嘢，抄埋Slogan自我勉勵。
電話鈴聲
錄低標語做Ringtone，效果有如響警鐘。
街訪：催眠自己做啲乜？
要成功催眠自己，最緊要定下嘅目標夠實際。訪問大學生，得出結論係佢哋自我催眠失敗率甚高，睇嚟時下年輕人真係無乜信念，定力唔夠注定臨尾香，同學們！講得出要做得到先得呀。
問題：有無試過催眠自己？有無效？
Patrick催眠自己繼續努力：「試過錄音催眠自己要溫書，好有效！煩到瞓唔着。」
Sandy催眠自己要守時：「試過寫Blog，催眠自己要樂觀啲，要守時，有男朋友幫助會事半功倍啲。」
阿Wa催眠自己精神啲：「內心同自己講唔好瞓，精神啲，但最尾都搵周公。」
Amy想瞓少啲：「未試過自我催眠，唔似有效，搵人提醒自己好過。」
Coey催眠自己早睡早起：「試過考試寫紙仔提醒自己勤力啲，完全無效，搵笨嘅！」
Thomas想自己上進：「未試過催眠自己，聽落好似有效，會試吓。」
