金融海嘯再嚟一個巨浪，全世界嘅人信心盡喪，擠提排長龍嘅已經唔只係銀行之類金融機構，連小食店都排晒長龍，點解？市好時就話魚翅撈飯啫，家陣荷包缺水，所以香港討論區上，一班平時討論邊隻股好炒嘅散戶網友，呢期討論嘅係邊間小食店有平嘢食。
市況差燒賣撈腸粉
噚日重陽節有位粉嶺嘅街坊，中午食晏時段見到啲人排晒長龍，仲以為假期都擠提！望真啲原來係腸粉店啲客人，排隊買平價小食。可以有幾平？粉嶺街坊starksouth將價目放上討論區──「腸粉：一蚊一條，最少買兩條；魚蛋兩蚊6粒，最少買兩蚊；燒賣兩蚊4粒，最少買兩蚊。」佢仲話，食飽最低消費都只係4蚊啫，抵食夾大件，唔怪得其門如市！
PEELGOOD搭嘴話：「抵到爛！大手掃貨係時候！」股市就話有平貨畀你都唔敢執啫，食嘢又唔同講法，九重天話：「魚蛋兩蚊6粒，最少買兩蚊；買入一球，持貨5年，以5蚊沽出兩粒。」冇股炒就炒魚蛋都得！