鄭嘉穎噚日接受薛家燕新城節目訪問，講到近期全球金融海嘯，家燕姐踢爆嘉穎將名下股票轉入某女人戶口內，嚇到嘉穎只識儍笑，原來接受嘉穎股票嘅人就係鄭媽媽。嘉穎話近年開始投資股市，點知早前鄭裕玲叫佢將手頭上股票盡放時，佢貪心冇放到，𠵱家賬面足足蝕咗過百萬，佢決定將所有股票轉入媽咪保險箱，等十年八年後退休先拎出嚟睇。
與阿佘做螢幕情侶
另方面，有報道指樂易玲有意將嘉穎同佘詩曼塑造成螢幕情侶，嘉穎話好耐冇睇雜誌，唔會理八卦新聞，若果公司有意將佢哋組成螢幕情侶，佢都唔會知，總之𠵱家專心賺錢買樓。對於佢即將同阿佘合作拍新劇《劉三好》（暫名），嘉穎同馮仁昭講未同監製開會傾，但唔會介意同阿佘合作，佢認為同公司大把機會見到，唔會因緋聞影響而尷尬，可能監製覺得角色適合佢哋，總之工作還工作喎。至於陳浩民日前喺澳門登台攞緋聞嚟講，又話同嘉穎係好朋友，嘉穎認為浩民係講笑，佢哋識咗好多年。
另外，查小欣噚日喺節目話日前喺商台走廊撞到周麗淇（Niki），當時佢啱啱同鄭嘉穎做完訪問，所以就問Niki有冇聽到鄭嘉穎話有致電慰問Niki，但Niki即刻話：「冇聽到，冇嘢講。」