同好多香港人一樣，認識夏永康WingShya都係從王家衞的電影《花樣年華》、《春光乍洩》、《2046》開始。其實這位王大導的御用攝影師除了在大家印象中常用上藍藍綠綠的舊菲林或是「鬆郁矇」的outfocus柔鏡之外，都有Moody又實實在在的作品，今次與日本漫畫大師田中達之crossover，實行將漫畫變相紙，令整個project玩味更濃。
記者：蒙為亮
攝影：梁細權
部份照片由受訪者提供
由一頁漫畫開始
問到夏永康是否一個典型的漫畫狂迷，他立刻耍手擰頭：「自己真係唔算好鍾意睇漫畫，由細到大都係人哋睇乜我睇乜，最記得係《阿基拉》，因為我覺得成件事包裝得好有「嘢」，由主角到壞人，甚至連小角色都型到爆，入面啲造型真係一世都記得。」其實阿Wing今次漫畫crossover攝影的企劃，一樣有型，型就型在合作契機竟然是由隨手買的漫畫而來，的確有點無厘頭，不過整件事在沒有商業計算下發生，這種藝術家的隨性而為，即時變得很有型格：「成件事由發生到完成真係好『自動波』，有一次去日本做嘢，悶悶哋買本漫畫書睇吓，一睇頭幾頁已經非常鍾意，整個故事都好有電影感，幾乎有齊所有電影分鏡，所以就忽發奇想，萌生了漫畫變影展的構想，本漫畫就係田中達之嘅短篇集，之後返香港叫助手Contact田中先生，之後佢竟然一口答應，順理成章就成就了這個影展。
夏永康更表示作品用上大陸女ModelJacquine加上尹子維，這個配搭新鮮之餘仲好重電影感覺，而且加到田中的繪本之中，立即有錦上添花的效果。「其實自己一直都有同Jacquine合作開，我覺得佢係一個好Pro嘅內地Model，而且散發着獨特的感覺，至於尹子維就因為佢有啲鬍鬚，男人味以外着上毛毛公仔衫之後感覺更加特別。今次自己影得算快，兩個星期就影晒，而且100%香港取景，感覺非常地道。」之後小記八卦一問，身為人父的WingShya，閒時有無同囡囡一齊睇卡通片、睇漫畫呢？「睇都唔睇呢啲啦！同佢一齊要睇史力加㗎！哈哈……」其實試吓同囡囡睇《阿基拉》話唔定佢會鍾意呢？阿爸……
這張是WingShya在整個攝影展中最喜歡的作品，因為很有拍電影的感覺，而且和田中達之的原著繪本非常相似。
Prevationamangastory的精妙之處是將潮流文化中以及另類的感覺二合為一，有punk味，有cosplay，總之每一張作品也很「潮」。
多謝王家衞無佢無我
訪問夏永康，總不能不提「伯樂」王家衞，阿Wing坦言從來沒有那種飛上枝頭變鳳凰的感覺，而且成了名還是默默的多謝王導演：「我非常respect佢，一同佢合作就會將自己最好嘅嘢畀晒佢，平時我接job、做廣告，我都會有say，有啲咩我一定出聲，不過同王家衞合作一定佢話事，反而我也會盡量配合佢，因為無佢無我。」輕輕一句，正是男人與男人之間的情深義重，至於被問到自己到目前為止最滿意那一部作品，他想也不想就答：「《春光乍洩》，當時自己仲唔係好識影相，王家衞要求又高，有啲shoot真係拍咗好鬼耐都唔收貨，不過𠵱家諗番都幾好笑，睇到有幾個鏡頭因為我影得唔好，哥哥同偉仔濕吻咗十幾次，哈哈……」WingShya的笑聲很豪邁，無話不談，由影展到家庭，講到囡囡，再講到王家衞，他總是滔滔不絕的，或許神秘的矇矓感覺只會在電影海報中出現，並不完全反映真實的WingShya，他又不諱言，鍾意影女人多過男人：「女人可能天性貪靚，多一點可以發揮的空間，男人就會相對較少，而女演員中首選張曼玉，近排拍咗另一個Maggie，表現同樣出色，講緊係MaggieQ，上個星期幫佢同小田切讓為一套大陸電影在新疆拍宣傳海報，一開機0.1秒立刻有驚喜，果然去過荷李活之後真係開咗竅，哈哈……」之後又是一陣笑聲。
眼望北京心在巴黎
06年3月，阿Wing跳出香港在日本六本木新城森美術館舉行個人攝影展「WingShyaExhibition」，兩年後他坦言仍對在國外搞影展心思思，而且下一站還染指巴黎和北京：「真係好想喺北京或者巴黎搞Exhibition，揀巴黎純粹因為藝術氣息濃厚，想搞一個以電影主題的展覽，不過自己還需要儲多一點電影作品，現在自己有為其他電影影劇照，好似下星期幫郭富城的新戲影造型，巴黎的Exhibition終始不能只有王家衞的作品，畢竟有更多元素，才能令整個影展有更多不同色彩，至於選上北京，是因為近幾年因為工作關係經常北上做嘢，發現北京嘅藝術文化實在玩得太『癲』，idea新鮮之外，技術亦不斷進步，空間相對又越來越大，令他們的創作更為大膽，甚至是瘋狂，睇到呢啲作品，自己有好深感受。𠵱家我經常要接一啲Commercialjob，令到自己都覺得自己商業，真係好痛苦。惟有靠多啲去睇人哋點樣為藝術而藝術，自己先可以從商業中走出嚟，令自己多啲釋放，用番FineArt嘅角度，重新再上路。做得多有時就會盲目地為做而做，為影而影。」WingShya今時今日有權交行貨，而且大家依然拍手，不過只是自己也不可放過自己，或許就是這份Artist的執着令他穩坐香港攝影界第一把交椅。
夏永康嚴選酷愛之最
有情有義之最
夏永康：「有情有義嘅作品應該係自己拍的一個關於少林寺的影像故事，主要講述寺內的兄弟手足情。」凉都一齊冲，感情當然好啦！
用錢之最
整個少林寺系列全是夏永康在六本木個人攝影展的作品，但原來那個展覽的費用全由他自掏荷包，花了接近三百萬才能埋單。
滿意之最
夏永康自言《春光乍洩》可算是自己的招牌菜，在拍攝時一切都以感覺為先，可能就是這樣拍了一張又一張滿有情調的經典。
男主角之最
梁朝偉同張國榮一定走唔甩，因為毋須講太多，佢哋一埋位就已經好交到戲。
女主角之最
首選係張曼玉，因為佢本身已經好有美感，所以不時都會搵Maggie繼續合作。
「姓」的疑惑
點解唔係姓Ha係姓Shya呢？
由一聽到WingShya這個名字開始已經覺得好奇怪，點樣明明姓夏，應該譯為Ha，點譯都唔會變Shya㗎？所以小記今次決定一解多年的「姓」謎團，誰知聽到小記這樣一問WingShya即場大笑：「其實因為爸爸係山東人，當時佢剛剛移民香港，唔太識講廣東話。之後自己都無諗過改番個名，咁樣反而仲型！可能就係因為「型」，Shya這個「潮氣」名成為了今時今日他的工作室「Shya-la-la」。
Prevationamangastory(WingShya)
地點：OoiBotosGallery灣仔機利臣街5號地下
開放時間：星期二至五，早上11am-3pm以及6pm-8pm
查詢：25279733
網址： http://www.ooibotos.com