瞓晒身，一臉得戚，當然啦，新「車」入伙，出位「豪裝」等住Show！宮廷式裝潢華麗又十足夢幻感，再加埋大膽嘅紫色主調夠晒香艷，最爆係全車大堆頭閃石水晶睇到你兩眼發光，與公主嘅香閨大概相差無幾。一上車，肯定即時小公主上身。點解要瞓埋身？入戲嘛，宮廷裝梗係要性感！
記者：黎頌詩
攝影：陳細權
Model：Eriko
繁星車頂
香艷紫色車頂，鑲上數十顆巨型閃石，十足夢幻Feel。
閃爆後鏡
佈滿水晶嘅後鏡，在太陽映照下，遠遠已睇到：好閃！
寶石軚環
睇真，軚環上Toyota標誌一樣識閃。
開門即閃
門邊一排藍白LED小閃燈，閃住歡迎你。
公主部屋的真身係方匣子家庭車豐田Sienta。
改頭換面嘅座椅依然保留MPV實用本色，拉平座椅，可躺着數車頂「星星」。
移動公主部屋設計師Wing爆料，原來呢部係送畀女孩嘅禮物，冧死！
車主要求：紫，所以全車主調為濃淡不同嘅紫。
浮誇閃到眼花
呢部移動公主部屋穿梭大街小巷，肯定一眾路人甲乙丙昅到實。真身係豐田嘅方匣子車仔Sienta，四四方方加埋一身粉紅，十足禮物盒，車頭大大盞圓碌碌頭燈，下面氣壩又窄又長，睇落成個卡通公仔咁，不過，打開門先至係戲肉！先聲奪人係門邊地台一排LED閃燈，只係序幕，跟住嚟閃石水晶更加閃到你眼花。閃後鏡、閃軚環，內裝幻彩面飾一樣閃！最浮誇肯定係車頂，古典宮廷裝飾配上幾十粒巨型閃石，像點點繁星，好浪漫！相比起車外嘅粉紅，內櫳嘅紫就顯得女人味十足。原本嘅真皮座椅換上PVC，估唔到軟熟唔黏肉，舒服過真皮！未被紫色完全覆蓋嘅，就只剩部份軚環同錶板位及中控台，一種叫GoldenRainbow嘅帶淺啡雲石紋樹脂物料帶嚟幾分俏皮玩具感，
公主Look，辣妹格
好可愛、好女孩、好公主……大概無人會記得，Sienta其實係部七人MPV！內櫳嘅粉飾全屬整色整水，MPV本身嘅實用性未動絲毫，淨係一對趟門，已經暴露家庭車本色。座椅亦保留原本嘅機動性，推前拉後、收摺，甚至變成床鋪依然掂，此情此景，就梗要嚟招瞓住數「星星」啦！1.5公升嘅Sienta，用嘅係無段變速自動波，110匹，擺明係住家Feel。誰不知一大腳踩油，竟然係扯住去，尾喉仲轟轟作響，嘩，做乜公主咁辣？原來溫柔艷麗只係外表，四條咬地性強更跑得嘅輪胎，增強剛性嘅頂Bar、底架，催谷性能表現嘅電子點火、光導整流等，夠晒本事隨時嚇你一驚。
規格
引擎：1,496cc直4DOHC
馬力：110ps/6,000rpm
扭力：14.4kgm/4,400rpm
傳動：無段變速SuperCVT自動波
車價：約$170,000
公主部屋「裝修費」
內櫳：約$4,000
提升性能：約$11,000
查詢：Spec-R（23628007）