60個議員噚日逐一宣誓，四年前長毛創先河喺誓詞前後「加料」後，又玩嘢以「斷截禾蟲」方式讀出誓詞，今年重施故技高呼平反六四、結束一黨專政，其他議員都效法，社民連兩個黨友毓民、陳偉業宣誓時都加料，大嗌「權力歸於人民」、「中華人民萬歲」、「打倒官商勾結」等口號。
議員全程棟篤企
民主黨黃成智宣誓好似拉票，加插自己政綱，要求增加生果金，何秀蘭則話要「以民主自由、人權法治，推動國家現代化」字句。根據秘書處講法，只要讀晒整段誓詞就算完成宣誓程序，即係議員可以任意喺宣誓時「加料」。新丁議員林大輝表現緊張，宣誓後忘記簽名，要詹培忠提醒補簽，好𤓓。
部份議員趁機「加料」盡訴心中情，其他議員卻被迫陪佢哋癲，事關宣誓時，所有議員要全程站立，有議員喺誓詞「加料」，令宣誓過程長達50分鐘，民主黨張文光事後話，下屆如果再有機會做議員，真係要認真討論吓呢個問題，其中一個議員宣誓時，其他議員可以坐低，否則日後有人變本加厲宣誓講足成個鐘頭，大家變相罰企，好無辜。