呢兩個禮拜，孫柏文睇到「雷曼投資者輸錢事件」嘅事態發展，越睇越火滾。由最初民主黨做show，畀買咗雷曼產品嘅投資者一個集體假希望，到今時今日，政府行政機關高調介入，強迫啲本地銀行硬啃，要令市民覺得政府做緊嘢。
政府明唔明白為咗呢班為數可能上萬嘅人，越「做嘢」就會越罔顧特區銀行體制穩健，越有機會令特區銀行爆發集體擠提潮，最終危害幾百萬個需要穩健銀行體制嘅香港人。孫柏文已經係特區數一數二，政治思維上最心胸廣闊嘅人，不過今日我都要講句：「曾蔭權係政治家？我呸！」
資不抵債隨時執笠
今時今日嘅金融海嘯，係建基於全球債主、存戶唔知道啲銀行手上嘅資產價值。因為唔知道資產價值，一旦被揭發少過負債，就可以即時執笠。不過今次呢個海嘯，起碼知道啲銀行負債有幾多，佢哋要上身負責還嘅數有幾大。
不過如果特區政府行政機關，成功令市民覺得佢哋有能力，強迫啲本地銀行為咗所有之前賣過嘅金融產品上身，本地銀行嘅資產負債表就會突然出現超級問號。多都唔使問，只要有人問政府：「曾特首，本地銀行賣過價值幾多嘅金融產品？本地銀行一旦因為你做嘢，被迫要賠款，究竟仲有冇本地銀行唔係資不抵債？」
當有咁大嘅不明朗因素，所有本地銀行嘅債主、存戶，即時對自己幫襯開嘅銀行出現恐慌。大家都唔使怕師奶提款潮，因為只要有差佬拉啲不誠實使用電腦嘅人，傳媒唔報道，就唔會發生。
恐慌提款潮會再現
不過嗰啲當特區銀行為資金避難所嘅大客戶，就會即時電子提款潮，將資金調去外國。政府行政機關，背後究竟幫唔幫啲雷曼產品投資者係其次，最緊要係喺全世界嘅目光下，狠狠地宣佈：「為追求更高回報，買任何投資產品自己要負上全部責任。如果覺得被誤導，就唔應該請求立法或行政機關幫手，因為香港有健全反欺騙嘅法例，有事就搵司法制度去爭取公義。」令本地銀行嘅債主、存戶，覺得本地銀行唔上身。
嗰啲好似孫媽媽咁，呢幾年嚟都千辛萬苦用盡方法，向銀行職員嘅推銷說不嘅百萬市民，今日政府幫雷曼產品投資者，簡直就係陷孫媽媽同百萬市民於不義。為自己嘅政治方便，去摧毀銀行體制嘅穩健，呢啲就係負責任嘅領導咩？
孫柏文
http://phatdat.blogspot.com