花旗股市前晚跌得好勁，亞洲股市噚日全部碌低，日股受日圓強勢拖累，急插952點，達9.3巴仙，港股跌幅雖然冇咁大，但亦超過8巴仙，其實都好傷，恒指16000關支持位話咁快就失守，恒指埋單急挫1372點，報收15431，15000關危危乎。
歐美股市立立亂，執筆之時，7大央行包括美國聯儲局及人民銀行齊齊公佈減息，救市措施有冇效仲要睇市場反應，股市短期仍然會好波動。
港燈C輪14742：𠵱家個市都係要打穩陣波，公用股風險相對較低，港燈（006）昨收45.35元，反彈睇48.50元，可以諗吓C輪14742，昨收31.5仙，有效槓桿6.1倍。
正股升上48.50元，14742可見46.6仙，正股跌穿43.80元就沽咗隻輪止蝕。
俊樺