投資者信心大崩潰，全球股市有如山洪暴發，直冲而落，港股再創出去年10月底以來新低，大跌1372點，低收15431，跌幅8.2%。中資股跌得更急，H指大跌964點，低收7452，跌幅11.4%，經紀行一片愁雲慘霧。
做定功課等上車
噚日下晝，好友食過番尋味，又想創造奇迹，大市在3點鐘仍跌緊千多點，在短短15分鐘內，抽高成850點，期指只係跌200多點，但大市俾淡勢籠罩，升勢只係曇花一現，跟住又再插過，臨尾跌勢仲急，插到最低收，期指結果收15288，大跌1400多點，大低水143點。由3點到4點嗰一個鐘頭，期指玩過山車，先升800點，又跌1000點，夠晒刺激，做啱邊，都幾和味！
全球大跌市，單日嘅跌幅揦埋都半成到一成咁計，真係百年難以一見嘅慘況，現時嘅市勢已經跌到無底可尋。雖然周街都係平貨，PE兩三倍嘅，隨手都可以執到幾件，但大圍形勢咁凶險，一日市勢未跌定，未有轉機，博反彈都未係時候。家吓千祈唔好手痕，但要開始做功課，列好張博反彈目標嘅名單，一有機會就跳上車。
首國PE不足3倍
大行同基金被迫要洗倉，唔問價掟貨，好多股票都跌到一仆一碌，唔少PE更低到兩三倍。有危就有機，第日大市反彈（必然會出現），呢類洗倉股亦會彈得快同彈得多，平時要幾個月才累積到嘅升幅，可能幾日就搞掂。
噚日下跌正股930多隻，好多隻都見基金洗倉，其中隻中通信（552）係重災股，由頭插到尾，低收3.24元，大跌1.56元，跌幅32.5%，成交7400多萬股；另外隻首長國際（697）亦插到0.74元最低收，大跌23.7%，成交6000萬股，往績3.3倍，預測唔夠3倍，真係大平賣。
金融海嘯引發全球經濟衰退，鋼鐵需求無疑會減少，但首國主力生產高附加值寬厚鋼板，在內地市場長期缺貨，08年（12月年結）的上半年，營業額84.5億元，升73%，獲利10.92億元，升135%，每股盈利15仙，保守估計全年每股盈利30仙，PE只係2.5倍，兼且會有成分息，真係好吸引。
郭兆誠