壓力大，唔好忍，嗌啦。嗌，喺身心行為學上，可以平衡調節身體機能，情況就似BB將自己要求同不滿，全部透過喊聲表達，係種極速舒解鬱結方法，咁當然唔係叫你出街亂吠啦，要揀啱地方不特止，仲要嗌得有法，點嗌？簡單，就嗌A~E~I~O~U啦。
記者：周靜雯
攝影：梁細權、陳盛臣
模特兒：Ceci、Eriko、Christy（StageModel）
嗌之備忘一：嗌單音！
身心行為學家李寶能話：「嗌，係最原始最有效嘅舒壓方法，潛藏身心嘅壓力，可以通過大嗌出嚟嘅聲音，由體內向外發洩。」斷估你我他都試過大嗌，嗌嗰陣仲會加入內容，例如：「點解淨係蝦我一個？」「點解揀佢唔揀我？」「點解我唔係李嘉誠？」等等，咪以為加入內容會有效啲喎，因為：「配合內容會有自我強化、自我暗示作用，內容越負面，越抒發唔到壓力，更會有反效果。」
嗌之備忘二：由細聲至大聲！
最好亂嗌「啊」、「哦」、「嗚」呢啲無意思單音，李寶能建議嗌「A~E~I~O~U~」。最舒服嗌法，係出盡全力深呼吸一口氣，直至胸腹有脹滿感覺為止，之後由細聲至大聲，先嗌「啊」、「哦」、「嗚」等單字；唔夠喉嚟多次，都係由細聲至大聲嗌「A~E~I~O~U」。嗌嘅次數適可而止，一次起兩次止，嗌破喉嚨無分加㗎。
廢話都係咁話，其實所有情緒困擾，最好都係搵輔導員或者醫生對症下藥，就算真係要大嗌，內容都唔應該有傷害性。嗌得唔好，輕則嗌破喉嚨，重則令自己越嗌越頹。
嗌之備忘三：揀啱地點
唔想俾人當儍仔咁睇，大嗌當然要搵啲人少地方，先唔會嚇親人，惹來途人甲乙丙丁怪異目光。首推最佳地點係機場，無吹水，影相嗰日我同三位Model入赤鱲角喪嗌，嗌完，人靚咗輕鬆咗，做嘢用心咗，身材好咗，寫稿快咗……
首推：赤鱲角機場
如果機場仲喺九龍城，呢個地點一定唔合格，因為飛機嘅巨大噪音會令人心律不正、影響腦電波同自主神經，嗌完心情會仲差；家陣機場搬到赤鱲角（港鐵東涌站搭S52巴士，總站落車，沿馬路即見機場），飛機同人嘅距離拉遠，噪音影響細，加上景觀開揚，望山看海，有風有景，嗌都嗌得開心啲。無錯係任嗌唔嬲，不過都唔好同飛機鬥大聲喎，盡嗌，嗌到耗盡最後一啖氣就得㗎嘞。
次推：龍翔道觀景台
李寶能：「越舒服開揚嘅地方，嗌完會有越多正面效果，因為整體環境已經令人放鬆，嗌得其所事半功倍。」所以近近地，龍翔道觀景台係個唔錯選擇（任何途經龍翔道巴士，在豐力樓站落車，徒步3分鐘即到），地點高，可以俯瞰九龍塘、朗豪坊同對面海中銀、IFC等，齋睇景都已經好爽。
三推：K房
唱K發洩一定Work，日本人更加有卡拉OK治療法，用音樂解開情緒受困者心結。李寶能：「卡拉OK除幫助到自我抒發外，更可以喺K友圈子裏面得到社交滿足，從而得到自我認同，繼而提升自信建立自尊。喺音樂伴奏下，情緒易誘發，壓力亦較易抒發。」又建議唱陳奕迅《浮誇》，唱完埋尾超高音「?凝視我別再只看天花?呀??」一段，真係成個人舒服晒。
一反推：天台
咪以為喺天台嗌好型，嗌嗰陣心情惡劣，隨時會被居高臨下嘅環境影響，衍生一躍而下嘅衝動。
二反推：𨋢
入𨋢已經好壓迫感，再大嗌只會令人心情沉重，減唔到壓不特止，被人㩒停部𨋢當你儍佬就唔好啦。
三反推：洗手間
洗手間屬私人地方，理論上任嗌唔嬲，但請記住，水管會將聲音傳到其他樓層，嚇到其他人盞攞嚟搞。
四反推：被竇
習慣喺被竇大嗌大喊嘅朋友留意，要戒嘞，因為大被蒙頭大嗌，會令人諗番起上次嘅不快，以後一冚被就會有種莫名其妙的哀愁，都幾麻煩。
