田少雖然選唔到立法會，但喺唔少黨員心中，仍然係自由黨主席不二之選。所以就算佢唔選主席，都力挽佢做名譽主席。點知呢個名譽主席位都俾人認為係皇上皇，引嚟唔少爭拗，思前想後，田少噚日正式向百幾位撐佢做名譽主席嘅黨員發信，強調已經決定唔會出任呢個職位。
唔係話田少唔想再理自由黨黨務，佢只係覺得，自由黨正經歷困難時期，自己唔想再挑起任何爭議，更加唔想俾一啲「別有用心」嘅人繼續製造事端，令自由黨再受損害。佢覺得自由黨作為全港最熟悉經濟嘅政黨，喺呢個全球金融海嘯中有太多嘢做，唔應該再繼續爭拗，所以全身而退係最好做法，希望黨友見諒喎。