臨近哈囉喂，梗係特別多怪事，最新恐怖經典《SilentHill》續集剛推出，果然無令機迷失望，現實中突如其來嘅怪事，令系列作踏入最嚇人一個層次，靈異事件發生後喺廣大討論區上流傳，一啲人話聽某某講、一啲又話親身遇到過、有人當無事發生。是耶、非耶？總之官方一日未有解釋，大家都要保持冷靜，唔好衝動買Game！
手掣撞邪玩死你
事緣係美版《SilentHill5：望鄉》偷步推出，好多機迷爭相購買，點知一玩真係俾佢嚇到鼻哥窿都無肉！
當劇情去到某個解謎點時，要輸入門鎖密碼，搞掂按○掣離開，好正常。奇就奇在美版一向將決定同取消掣掉轉擺，密碼唔啱想走，按Ｘ掣，但系統判斷你係Enter而唔係Back，但密碼又唔啱，遊戲即刻Hang咗喺度！
OK！Restart部機再嚟過，懶醒Set過啲掣以為避過一劫，點知《SH5》怨氣實在太重，你Set嘅掣唔會儲存，下次開機玩跟番原廠配置！谷鬼氣將啲掣大兜亂，系統索性唔理你，你有你改，顯示時一切依舊。西洋鬼節果然夠邪，官方夠膽死到家陣仲未有除Bug更新檔，呢四百幾銀惟有當破財檔災啦！
上次《Winning》又係臭蟲滿身，今次《SilentHill5》亦難逃厄運，金漆招牌連番重創，成個Konami得小島隻《MGS4》走得甩，PS3真係多得佢唔少，「唔夠硬」肯定喺背後笑到收唔到聲！
變異場景似電影版
個人最愛嘅三大日系恐怖經典中，《零》無PS3版、《生化危機》變成FPS槍Game，得番隻《SH5》值得期待，點知今集交畀美國Team開發，玩落原來主角又係兵器之王，刀槍劍棍鋸無一不精，格鬥動作多籮籮，似打《FinalFight》多啲。無計，遊戲界傾向鬼佬喜好，加入唔同動作元素本無可厚非，不過你都畀番啲驚嚇感我吖，攻擊方式五花八門，多過被鬼嚇，同特攝片《幪面超人TheNext》變成貞子片一樣，無厘頭！
鬧完一輪，平心靜氣咁講，《SH5》劇情其實幾好，講某個鎮建成初期，跟神訂立咗契約，四大家族依唔同方法獻上自家小孩，便可保天下太平。到Alex及Joshua這兩兄妹一代，老竇揀咗Alex去送死，點知陰差陽錯變咗Joshua跌落湖浸死，即係破壞咗神嘅契約，異變開始！
劇情好、畫面更好，系列玩得最勁嘅光暗表現，嚟到PS3版的確令人耳目一新，揸住支電筒喺黑暗中摸索，叫做有番啲恐怖無助感，女護士出場更令我相當懷念，最值一讚係異界變成裏異界時，四周環境同物件即時舊化，邊爛邊浮起，全部實時運算，跟足電影版異變時咁精采，達到系列作最高嘅表達層次。
《SilentHill5：望鄉》
遊戲類型：動作解謎
對應機種：PS3（$438）、XB360（$438）
遊玩人數：1人
