周潤發辭演了吳宇森執導嘅《赤壁》，放棄演周瑜一角，最終由梁朝偉頂替演出，日前周瑜嘅63代孫周柏泉話發哥辭演呢部戲，真係好可惜，因為發哥係周瑜嘅後裔。
根據周柏泉所講，佢一直有研究祖宗傳落嚟嘅族譜，喺江西吉安發現咗一套清道光30年嘅周氏族譜，廣東潮陽一樣有周瑜嘅後人，而發哥就係廣東潮陽周氏後人，係周瑜嫡系周應斗之後，相比南京周氏呢一支，周應斗更為顯赫。
「要返內地追查」
周柏泉認為如果當日發哥可以接演周瑜，相信同族血脈能夠令發哥將東吳名將周瑜演繹得更傳神。噚日馮仁昭問過發哥呢件事，佢話：「吓！咁好笑，我所知祖先係由江西開始散落到廣東，然後再散落到香港，至於係咪周瑜後人，我諗真係要返內地追查啦！」
發哥仲話：「其實我又唔覺得辭演周瑜呢個角色會好可惜，因為喺《赤壁》入面，周瑜個角色比較年輕，我演就大咗少少，偉仔就比較啱。可能將來有人開《周瑜外傳》，咁到時我咪有機會演呢個歷史人物。」
