做公務員嘅前途一向要睇係乜嘢職系，考入政務官職系當然係天之驕子，近日全力爭取加薪嘅警隊同消防，關係到全香港治安同人命安全，政府都唔敢唔畀面，撥資源都會手鬆啲。但政府有一個迷你職系，叫做園境師，佢哋係專業人士嚟㗎，地位同工程師一樣，喺好多部門負責綠化設計工作，包括建築署、路政署、房屋署。不過，佢哋勢孤力弱，成個職系只得40幾個人，助理園境師、園境師、高級園境師到總園境師，冇處長級。
有局長同八方講，香港嘅綠化工作做得唔夠好，同呢個職系咁微型都有關係，連綠化設計師都唔重視，局長話經濟起步遲香港幾十年嘅深圳，香港都比唔上。局長雖然位高權重，但綠化設計師唔係由佢管，佢都無能為力。