轆Book：14秒一按開篷　加州‧紅

轆Book：
14秒一按開篷　加州‧紅

5月，拉利喺網上只公佈三張照片加一小段Video，各大小論壇如瘋狂般轉載同討論，雞啄唔斷傾到10月，巴黎車展首度熱辣亮相，各地傳媒爭相報道，連隔籬位女同事都知道拉利有新版硬頂開篷推出，呢部FerrariCalifornia正式紅爆全球！

記者：徐影龍
攝影：伍慶泉

拉利史上多個第一

09版FerrariCalifornia點解咁矚目？全因新車一口氣創下多個拉利史上嘅首次，除咗破天荒將引擎由尾移番上車頭外，最大特點係正式加入硬摺篷頂潮流，好處係關閉篷頂後比傳統軟篷或拆篷美觀得多，而且開關前後兩個樣，誇啲講句，可以話畀一次錢買到兩架唔同Style嘅車！雖然Benz、寶馬，連標致都已玩過硬摺篷頂，不過California最過人之處係夠快，全電動㩒吓個掣就可開合，官方數字14秒，實地試玩過，Count到更快嘅11秒，可能廠方包埋按掣等反應、關閉後扣緊嘅時間啩。
叫得California，並非係意大利佬為討好美國人而設，而係標榜雙門開篷車喺陽光與海灘環境下奔馳嘅意境，故新車外形設計得稍為細小，降低咗拉利過往霸氣，不過一貫流線設計依然夠Sharp夠醒，兀尾Design仍然充滿俯撲之勢，四出式尾喉、兩側車鰓及頭冚入風口，標示強猛動力但不浮誇。

細細粒唔易食

California改為遊車河Feel，售價亦屬拉利中嘅入門級，雖然埋單都要二百幾萬，不過以跟F430同級偈嚟計，已經平咗成百萬喇。講開F430，新車採用同款4,300c.c.V8NA引擎，不過就改為前中置式佈局，可算係縮水版F430，最叻係具有拉利最新嘅缸內直噴技術，爆炸力比F430更強勁更慳油，馬大達到460匹之譜，4秒內完成0-100km/h，千祈唔好見佢細粒就易恰呀！
引擎配合7前速波箱，極速能達至310km/h，香港用唔着唔理佢，不過點都唔可以忽略其雙極力設計，一波未完，另一波齒輪已Standby妥當等轉波，官方話所需數字近乎零，快過馬莎手動轉波，呢點又係自動波箱突破另一層次，連賽車都開始有自動波，棍波越嚟越Out囉。
值得一提係循迹系統跟老大哥599GTBFiorano一樣，採用F1-Trac嘅TCS，結合電子測速器E-Diff，令到攻彎時有產生更大轉向能力及穩定性。

1.馬力實在太大，四出式尾喉令排氣更暢順，直接提升動力輸出表現。