金融海嘯近日撲向歐洲，個市差成咁，啲球會見唔對路就立即郁人，港人好熟識嘅前南華同東方教練米路，今季仲未幫葡超球隊比蘭倫斯喺聯賽開齋，5戰錄得2和3負，結果剛慘食無情雞。
我求大俠收到風後，立即向同米路好熟嘅球不平收料。聽球不平講，米路帶過去比蘭倫斯嘅體能教練都收到大信封，而且仲經已攞錢走人，但佢本人同球會喺賠償方面就仲未斟掂數，而據報佢簽咗兩年合約，月薪係港紙10萬蚊以上，照咁計應該賠過百萬畀佢，所以隻雞雖然無情，但就相當之肥美。
查實米路之前喺香港教南華，年薪都成100萬，上季教東方月薪亦有成6至7萬；加上佢喺葡萄牙同巴西教波每月收開10萬，而且喺05年俾帕拉尼恩斯炒魷時又攞咗一大筆賠償，所以佢隨時家財千萬。估計米路會先返巴西小休，但佢身家咁厚，真係有條件放個悠長假期。另外，佢家陣唔使教波，更加可以專心喺《蘋果波經》畀獨家貼士，繼續帶挈本報讀者。
「大菲」徒弟不愁寂寞
所謂有麝自然香，米路都算有料，所以唔驚冇班落，佢喺香港教波時，幫南華攞過兩次甲組聯賽冠軍，又3次當選最佳教練，所以連傑志助教鄭兆聰亦推崇備至，大讚佢教咗10幾年波，評價都係正面嘅。
話時話，「大菲」史高拉利原來係米路嘅師傅，米路喺03年可以教葡超嘅國民隊，全靠史高拉利幫佢搭路。「大菲」家陣係英超車路士嘅領隊，唔知米路食完個肥雞餐之後，有冇機會去倫敦搭「車」呢？