紐卡素開季7場聯賽1勝2和4負排尾3，仲要喺英聯盃Out埋；雖則紐記傷兵多，但以佢哋人腳，成績冇理由差成咁。我求大俠就八到點解，原來中咗咒！
英國《太陽報》為咗解開紐記沉淪之迷，搵咗超自然專家杜利華布朗去佢哋個主場聖占士公園球場睇睇；布師傅用紅外線探測器同埋電子磁場計，喺佢算完一輪之後，就話紐記中咗咒。
布師傅咁講：「詛咒源於所有負面嘅諗法，你可以感受到呢度啲氣氛。當有成5萬人諗埋相同嘅負面嘢，得出嚟嘅結果就會一模一樣，呢樣嘢就似係負能量漩渦。」
「詛咒源於負面諗法」
布師傅補充：「要化解其實好簡單，諗嘢模式唔同就得；加埋有合適人選上場，就會雨過天青。換句話講，只要艾殊利（紐記班主）走人同基瑾（紐記前領隊）肯回巢，衰嘢就會冇晒。啲人成日話新特蘭中咗咒，佢哋搵咗人嚟作福，結果上季唔使降班，睇嚟真係work㗎！紐記有咁多球迷，不缺正能量，只要佢哋都以球會為傲，一定可以幫球隊轉危為機。」我求大俠唔知布朗師傅講嘅嘢真定假，但佢哋有奧雲、高洛仙尼同杜夫等好手壓陣，只要打番起信心，加埋球迷支持，應該可以脫離困境。
前晚佢哋喺英超聯作客愛華頓，就喺落後兩球下憑史堤芬泰萊同杜夫各入一球迫和對手2:2，結束聯賽4連敗走勢，唔通搵布師傅睇完之後真係開始轉運？