噚日重陽節，八方有個朋友俾金融海嘯搞到心煩氣躁，話要應節去登高避難，走去山頂行個大運。點知山頂鬼咁熱鬧，首先中午時分喺盧吉道一帶，撞到新鴻基郭氏兄弟陪阿媽行山，但三兄弟只見兩個細佬郭炳江同郭炳聯，唔見大佬郭炳湘。八方個friend話，同行仲有十幾人，似乎係郭氏兄弟嘅教會朋友，郭炳江仲扶住個失明人士行，郭炳聯就傍住郭老太。
呢頭撞完富豪，嗰頭佢又撞到德成局長。德成局長嘅大佬曾鈺成噚日喺電台節目仲猛被人問點解唔敢認係共產黨，佢就優哉游哉去行山。咁都仲未撞完，原來連阿涂都去咗山頂登高湊熱鬧，仲同一個貌似媽咪嘅女士一齊，同行仲有兩個小朋友。