救市方案未能刺激港股，周一恒指下挫878點，市況慘淡，散戶入市意欲低迷，嘉賓指雖然美國救市方案已通過，但在環球借貸市場不濟的情況之下，可能未來一段時間股市依然會處於低迷期。
康：灝天金融研究部主管兼零售證券部總裁 黃偉康
錦：法興證券衍生工具部亞洲區董事 李錦
孫：主持 孫柏文
孫：今日（周一）市況悲慘，連救市方案通過都要跌，散戶應該點樣解讀股市呢？
康：歐洲金融機構相繼出事，似乎數目仲會越來越多，令港股沽壓依然好重；而雖然救市方案已通過，但係短期問題係歐美銀行同業拆息依然高企，當環球借貸市場唔暢順，引致整體投資市場表現都係好悲觀，會令港股處於低迷期至少兩個星期。
錦：期權市場方面睇到引伸波幅有擴大情況，反映市場覺得下跌嘅機會相當大，投資者亦對高風險投資興趣不大，股市被沽都係因為咁。所以現時投資者應該保護自己手上嘅現金比較好。
張小姐：我喺4蚊買咗工商銀行（1398），上到4.8蚊冇走到，𠵱家點搞好呀？
工行$4.6要止賺
康：你可以喺4蚊買到，我就建議你唔好走住，因為早前滙金先啱啱開始增持工行，仲話未來12個月都會增持，所以你應該睇耐啲。短期波動一定有，但如果你係想睇短線，可以睇4.8蚊。
錦：其實4.8蚊已經上過三次，應該要趁機會走。短期反彈會一次比一次弱，嚟緊個走勢可能會喺3.8蚊至4.5蚊上落，4.6蚊就會係第一個阻力位。
楊太：𠵱家歐洲金融界咁亂，恒指會唔會大波動？
宜炒股唔炒市
錦：𠵱家入巿最緊要搵止蝕位，近期個巿更一定會好波動，而我相信跌到落16500點會有反彈，反彈完就應該先離場。
康：我唔太贊成玩指數，因為短期內啲恒指成份股股價會兩極化發展。有啲股份一早已經被人拋咗落嚟，所以可能已經搵到個底部。例如內銀股同中國人壽（2628）咁，佢哋再跌嘅幅度我睇唔會好大。平保（2318）解決咗富通集團問題，應該唔會點跌。但係本地地產股近期拋得急啲，當兩邊拉扯，要估指數表現變得困難咗。
今日嘉賓
click入 http://finance.appledaily.com以webcam參與節目及收看
歡迎phonein28698262暢談心得亦可email至mailto:[email protected]搶先貼股
