鄭大班唔做議員，重出江湖，返回十幾年前捧紅佢嘅亞視做節目，點知亞視十幾年如一日，冇乜宣傳，左丁山連大班幾時出鏡都唔知。佢頭炮訪問財經事務及庫務局局長陳家強之時，退休大記者打電話嚟：「喂，大班開咪質陳家強，好好睇，快快轉台去亞視！」左丁山正在上緊網睇彭博，惟有開番電視。大班真係入型入格噃，發問時七情上面，狀似甚為肉緊，做完四年議員之後，政治修為又晉升一級。反而陳局長未能發揮教授作風，對答有啲拘謹，顧頭又顧尾，與大班相比，處於下風矣。高官上呢類節目，想唔俾大班恰死，要硬番一啲至得。
點知睇睇吓，大班話下半場要轉過去亞視第幾號（唔記得咗冧巴咯）高清台，家人當堂噓聲四起，我哋冇高清台，即係唔使睇啫。以爭取收視率及廣告而論，成個節目靠鄭大班做生招牌，應該一氣呵成在亞視本港台直播全場，然後到高清台重播啫。𠵱家亞視播一半吊晒癮，直情係倒米。鄭大班素來有生意頭腦，不如包咗個節目嚟做，搵埋廣告贊助商，指定時間播足一個鐘頭好過。
左丁山矇查查，以為大班嘅「也文也武」係一個星期一次，點知上星期五十點鐘偶然轉台，又見到鄭大班大戰黃毓民，哦！原來此節目係一個星期五次嘅，晚晚十點鐘播出，鄭黃呢兩位昔日《龍門陣》拍檔，𠵱家各自搵食，各自紅過亞視，可謂異數。兩人一問一答，自然火花四起，但過癮半個鐘頭啫，又話要搬過去高清台，家人又試噓噓聲，熄電視可也。於是諗起，美國霍士電視近年以清談節目搶閘，美國收視率高過CNN好多，其中一個係香港時間早上十一時（紐約晚上十一時）播出或重播嘅O'ReillyFactor（主持人O'Reilly係大右派），有時鬧人鬧得好過癮，十月三日就與眾議員BarneyFrank為咗美國金融問題互相大駡，居然夠膽鬧議員係coward，喺英語世界嚟講，coward（懦夫）係好嚴重嘅指控，奧拉利對住眾議員手指指，甚為驚人，唔怪得美國觀眾話過癮。香港有四個電視台，睇吓邊個夠膽請鄭大班主持類似節目，收視與廣告一定不愁。