今日係新任議員嘅大日子，事關佢哋進行莊嚴而隆重嘅宣誓儀式之後，就會正正式式成為立法會議員。八方同好多市民一樣，依然對上屆長毛嘅斷截禾蟲式嘅宣誓方法念念不忘，試問幾多人會夠膽喺宣誓時玩嘢但又吹佢唔脹呢？今屆除咗長毛，仲有毓民同法律超人謝偉俊入局，唔少人都等住睇吓變咗惡人谷嘅立法會，今日有咩好戲上演。
長毛都知道佢啲支持者對佢好有期望，希望佢食過翻尋味再嚟多鑊，所以噚日同八方預告，今日一定「不負所託」，繼續玩嘢；至於有乜出位奇招？自然要賣個關子，費事未開始就被人叫停，阻礙佢嘅獨家大計。曾經講過唔會學陳克勤「搓mybreast」嘅長毛，可以考慮用流利兼準確英文宣誓喎，咪當係塞錢入同事個袋囉。
用基督教搭國語宣誓
好多人亦對首度殺入立會嘅毓民有期望，希望佢同長毛一樣攪吓局，毓民就話自己今日會用基督教嘅方式搭國語宣誓，唔通想藉此話畀人聽佢查實熱愛祖國？毓民仲預告第日可能要用國語提質詢，兼且要求官員用國語回答，實行嚟個國語大測試，「煲冬瓜」麻麻哋嘅高官就因住喇。
原來潮州怒漢詹培忠都想用潮州話宣誓，可惜立法會限定議員只可以用廣東話、國語同英文發言，令到佢覺得好無癮。至於玩嘢呢家嘢，金勞詹大嘆自己已經老喇，呢啲粗重嘢都係留番畀啲後生仔負責喎。
曾經以裸照名噪一時嘅法律超人謝偉俊阿Paul，一反常態會低調地宣誓。佢話以前做大狀時，任何出位嘅嘢都會喺法庭以外；家陣做咗議員，就算有出位嘢都一樣會喺議會之外，所以佢會堅持遵守議會規則，唔會搞事；換言之，大家見唔到佢赤裸宣誓咯。
除咗呢堆惹火人物，唔少新人都肯定係鏡頭焦點，尤其嗰幾位矚目女新人，大家都會金睛火眼昅實佢哋有乜差池。八方睇好陳淑莊會順利完成任務，因為做慣大狀嘅佢，平日上庭都要宣誓，佢自己都話聽日會當去法庭宣誓咁嚴肅處理。
近排鍾意搞爛gag嘅葉劉淑儀都應該實食冇黐牙，以前做局長時喺立法會俾人狅插都冇問題，區區宣誓又點會難倒佢？不如睇吓葉劉係咪會着到花枝招展咁去搶鏡仲好啦。
mailto:[email protected]