貪婪成為金融海嘯嘅關鍵詞。廉署網站最新一輯《重大案件》今日推出，講70年代轟動一時嘅電話公司貪污案，可謂應景之極。當年案中主犯同屬電話公司物業部，喺批出合約時貪污呃公司錢，保守估計侵吞至少200幾萬。廉署話，當年200萬已經可以買到太古城10個1,000呎單位。
案中主腦電話公司物業經理係當年繼葛柏後，第二個被廉署成功引渡回港嘅英國人。當時廉署需要喺兩星期內準備好三大鐵箱引渡文件，於是召集60多個同事，即執行處一成人力，租用六部影印機，七日七夜不分晝夜影印文件，最終喺1978年聖誕節前，航機起飛前廿分鐘，將三大箱送抵機場，運往倫敦。案中主腦最終17項貪污及串謀詐騙罪名成立，入獄四年。