一班立法會新丁噚日初試啼聲，首次以議員身份喺議事堂發言提問。毓民同長毛雙劍合璧狙擊曾鈺成最精采外，芸芸女將要數葉劉夠出位，居然以小女人嘅姿態，話自己「獨立、新丁又係女性」，要角逐主席嘅曾鈺成同肥仔明，承諾捍衞佢呢等「弱勢議員」嘅權益，難得曾鈺成面不紅耳不赤咁笑住同葉劉講：「不如加入大政黨，譬如民建聯。」搞到大家打晒冷震，毓民更忍唔住大嗌「佢哋喺度打情罵俏」。
葉劉：我驚我陀衰你
以前做保安局局長推23條時，葉劉要幾強悍有幾強悍，一時話要捍衞髮型，一時又叫人「放長雙眼葉局長冇呃你」。估唔到佢潛修幾年重返政壇，果然修成正果，識得喺適當嘅時候發揮吓女性嘅「溫柔」，好似噚日咁，話自己係冇後台撐嘅獨立議員，而且又係女人又係新人，有啲撒嬌意味咁問兩個男人點捍衞佢嘅權益，仲好無厘頭咁話成日俾人亂安花名，好鬼攞命。講完仲喺度眨晒眼，Watt數十足。
葉劉講完成班議員已經喺度爆笑，曾鈺成笑笑口咁答佢：「冇人會覺得葉太你係弱勢。」仲話如果唔係，葉太可以考慮加入大黨，例如民建聯。點知葉劉意猶未盡，回應一句「我驚我陀衰你。」毓民率先頂唔順，話佢哋居然喺議事堂打情罵俏，八方直情覺得佢哋好似喺度flirt緊。另一主席候選人肥仔明就唔知點答葉劉好，只係話葉劉競選時標榜獨立身份，咪保持獨立嘅形象囉，答得冇嚟情趣。
反觀其他女新人，好似Tanya、鼠王芬同李慧琼咁，雖然都有問問題，但都係講啲好正路嘅嘢，冇葉劉咁搶。不過，對唔少議員嚟講，新座位嘅新鮮感比呢場小小小圈子選舉更吸引，好似公民黨咁，由上屆右邊轉坐左手邊，而且由第二排改為第一排，可惜左手邊第一排第五個位喺轉彎位，令Tanya要同佢哋傾偈都要傳紙仔，佢仲差啲行錯路搵唔到女廁。但黨魁余大狀就覺得位置幾好，事關個轉彎位可以有空間畀佢擺嘢。
民建聯則由左手邊移過右手邊，方向大挪移。據聞主席譚耀宗差啲攞錯葉國謙隻杯飲水。自由黨坐咗喺相機房前面，似乎唔係太得黨員歡心，梁劉柔芬一出嚟就猛呻條絲巾俾路口邊條柱刮花咗。中指黃就將路口位讓畀寶哥哥，令寶哥哥得以安坐原位。
mailto:[email protected]