今年颱風特別多，上星期先走咗個黑格比，前幾日又來個海高斯，吹吹吓突然轉個90度彎，話會打到香港正一正！諗住周六日實無街去，又要捱罐頭餐，諗到都覺得無啖好食！雖然「風」迴路轉，海格斯減弱打唔成風，但聽聞嚟緊仲會有颱風，唔想無啖好食？今次教你煮四款由罐頭變化出的菜式，唔話你知，食咗都唔知係罐頭！
記者：劉明慧
攝影：周旭文
豆豉忌廉魚香意粉
製作難度：★☆☆☆☆
0hr15min
豆豉鯪魚炒菜就食得多，原來煮意粉都得喎！配合忌廉汁，Creamy之餘，仲有少少鹹香味。
材料
罐頭豆豉鯪魚1罐、洋葱1/2個（切絲）、蘑菇8粒（切片）、扁意粉250克、忌廉250毫升、雞粉/芫荽/意大利黑醋各少許、鹽/油各適量、蘆笋少許（切段）
做法
1.煲滾水加入油及鹽，再放扁意粉冚蓋煮7至8分鐘，撈起瀝亁水備用。
2.將罐頭內的豆豉撈出，瀝亁油；鯪魚肉切碎備用。
3.起鑊不用下油，以中火白鑊爆香豆豉，再下洋葱絲爆香，再下扁意粉、蘑菇片及鯪魚肉同炒勻。最後下忌廉、雞粉及蘆笋略炒後上碟。
4.面撒芫荽碎及意大利黑醋即可。
貼士
如果意粉即煮即炒，可以將意粉烚7至8分鐘。但如先煮定，烚5分鐘已足夠，還要過冷河瀝亁水，加少少油拌勻，才可保持質感，不會過腍。
鮮蝦餐肉Jambalaya
製作難度：★★☆☆☆
0hr20min
午餐肉煎香之後，連埋蝦肉同蔬菜煮成意大利風味的燴飯（Jambalaya），米粒與午餐肉同樣有咬口，而且又有番茄雞湯味，非常飽肚。
材料
意大利米11/2杯、番茄碎1罐、雞湯300至350毫升、午餐肉250克、熟蝦肉320克、西芹3條（切粒）、洋葱1個（切碎）、牛油少許
做法
1.午餐肉切粒煎香備用。
2.大火燒熱油轉中火，加西芹粒略炒備用。
3.大火燒熱油轉中火，下洋葱碎炒至香及軟身，下意大利米炒勻，然後加入1/3份量雞湯。
4.待米粒吸收雞湯後，再分兩次加入剩餘雞湯，不時攪拌及半冚蓋焗煮，待米粒半熟就加入番茄碎。
5.米飯煮至軟硬適中，加蝦肉、午餐肉、西芹粒及牛油拌勻。
貼士
烹調意大利米前，千萬不要洗米，因為會洗走其澱粉，煮熟後口感會變得又粉又難食。
焗豆芝士雞翼
製作難度：★☆☆☆☆
0hr40min未計醃雞翼時間
茄汁豆平日撈飯食，都已經可以搞掂一餐！今次放在雞翼下面一齊焗，加埋蜜糖醬汁，雞翼脆得來又Juicy，茄汁豆吸收所有精華，撈飯食就更好味喇！
材料
雞翼12隻、叉燒醬2湯匙、蜜糖1湯匙、生抽/黑椒碎/混合芝士碎各少許、茄汁焗豆1罐
做法
1.雞翼抹亁水份，加叉燒醬及少許生抽拌勻，醃一晚。
2.調校焗爐溫度至200℃，預熱15分鐘，將雞翼放在已鋪上錫紙的焗盤上，放入焗爐焗20分鐘。
3.將醃雞翼的剩餘醬汁，加少許蜜糖及生抽拌勻，變成蜜糖醬汁。
4.茄汁焗豆放焗盤內，放上雞翼，表面掃上蜜糖醬汁，灑少許混合芝士碎及黑椒碎，再放入焗爐焗10分鐘即可。
貼士
雪藏雞翼溶雪後要抹亁水份，這樣才會醃得入味。
茄汁免治肉批
製作難度：★★☆☆☆
0hr30min
表面的薯茸焗得香噴噴，混合埋加了茄汁及蘑菇的鹹牛肉，撈麵或飯都咁好食。
材料
蒜茸2湯匙、生抽11/2湯匙、茄汁5湯匙、糖1湯匙、水/鹽各適量、鹹牛肉210克、罐頭蘑菇適量、烚熟薯仔250克、蛋1隻、溶牛油2湯匙、芥末1湯匙、麵包糠少許
做法
1.中火燒熱油，將蒜茸爆香，下鹹牛肉炒勻，再下茄汁、生抽、糖及水同煮滾，煮成肉醬後下蘑菇。
2.薯仔壓茸，加入牛油及雞蛋混合，以鹽及芥末調味。
3.將焗爐預熱15分鐘，把肉醬放入焗盤內，薯茸鋪面，再灑些麵包糠，放入焗爐以220℃焗10分鐘至表面金黃色即可。
貼士
薯茸加入蛋及牛油，焗起後顏色會靚及均勻。另外芥末醬或芫荽碎，鋪在肉醬或者放肉上面，味道會更香更濃！
網上重溫
http://cooking.appledaily.com