滕麗名同郭政鴻呢對緋聞男女，噚日喺大埔一私人屋苑嘅泳池，拍無綫劇集《桌球天王》嘅外景，呢對戲假情真嘅拍檔今次可謂奉旨談情，三點式泳衣上陣嘅阿滕同鴻仔喺泳池邊有一場濕身親熱戲，鴻仔話劇情講呢啲親熱情景係佢自己幻想出嚟，當佢發完夢之後發覺原來係咀緊艾威，嚇到佢即刻用泳池嘅水嚟洗嘴！
喺未埋位之前，鴻仔話都係第一次見阿滕着泳衣，問佢有冇期待時，鴻仔就話：「嘩！拍戲啫，點期待呀？我反而覺得有少少緊張同尷尬，咀完阿滕又要咀艾威，好彩同艾威私底下好老友，不過唔理得咁多，都係跟劇本做，男同女都照咀。」
肥10多磅
阿滕話佢今次都係第一次拍劇着泳衣，肥咗10幾磅嘅阿滕，本來都有諗過收吓身，但係咁啱呢幾日有啲感冒，噚日朝早開工前仲有啲想嘔，搞到連拍接吻戲必備嘅薄荷糖同香口膠都冇準備，好彩阿滕有一個體貼嘅好朋友鴻仔，一早準備晒所有嘢，仲連浴袍都預備好。不過到正式埋位嘅時候，可能現場有唔少傳媒，搞到阿滕嘅表現有啲唔自然，反而鴻仔一於少理，喺唔同角度咀咗四次，艾威就咀咗兩次咁多。
