以往立法會議員未正式宣誓前，主持非正式會議嘅就係田少，事關佢喺議會資歷深，兼且田姓筆畫少，所以一定係佢做揸fit人。可惜田少未能重返議會，結果暫時主持一陣大會呢個重任，就落咗喺白鴿黨主席何俊仁身上。
噚日仁哥就做咗兩個鐘嘅立法會主席選舉辯論會主持，過咗一陣主席癮咁啦。八方覺得仁哥主持得幾公道，甚至有啲偏幫建制派㖭，事關佢呢頭叫完何秀蘭唔好問兩條問題，嗰頭又畀民建聯李慧琼問咗兩題，仁哥都即時覺得有啲唔妥，自嘲為保中立可能矯枉過正咗。新丁惡男毓民噚日以「哨牙仔」同「長毛」嚟稱呼同事，仁哥都叫佢唔好講花名；毓民大大聲話你可以趕我出去威番次吖？難得仁哥好坦白咁話可惜佢冇權，否則毓民可能真係俾人趕喎。