股神畢菲特愛飲櫻桃味可口可樂好多人都知，但原來廿幾年前，佢係百事忠實粉絲，仲鍾意自溝櫻桃味百事。不過後尾可口可樂推出櫻桃口味，當時嘅可口可樂總裁兼老友DonKeough親自力sell，畢老先變心，轉飲可口可樂。據佢本《雪球》自傳講，畢老一向以長情見稱，呢次口味360度改變，嚇咗屋企人同朋友一跳。
自溝櫻桃口味
除咗愛飲可樂，畢菲特亦係可口可樂公司最大單一股東，揸住8.7%股權。87年尾，可口可樂同百事爆發減價戰，拖累可口可樂股價急挫，吸引股神伺機入股。其實，畢菲特老早已鍾情可口可樂，研究公司業績多年，喺畢老心目中，可口可樂從來唔係雪茄屁股（CigarButts，即被人丟棄但其實仲有價值，可啜多幾啖嘅煙蒂股），相反係一間財源滾滾、營運效率高、擁有穩定現金流嘅優質股，佢只係等合適時機先至出手掃貨。
股神經常掛喺口邊嘅一句話，「投資要做足安全界限（MarginofSafety）」，一家公司嘅未來業績增長預測只係數字遊戲，並唔準確，股票要下跌至一定安全程度，股價低過公司實際價值，先至值得考慮吸納。畢老不違言，「若不是當頭棒喝吸引的投資，自己根本不會考慮。」精打細算嘅畢老，入股可口可樂前，仲做咗個回報預測，計算將筆錢投資冇風險嘅國庫債券，同買可口可樂股票有乜分別，算清回報先去馬投資。
（第四集）