近日樂壇接連傳出喜訊，繼陳慧琳日前嫁作人婦後，36歲男歌手梁漢文（梁炳），前晚效法陳慧琳在演唱會上宣佈婚訊，於今年12月18日迎娶拍拖10年的女友林文慧（Karen），一向嗜杯中物的梁炳，更笑言結婚當日滴酒不沾，交由逾20個好兄弟專責擋酒。
側田前晚在九龍灣國際展貿中心舉行的演唱會，請來梁漢文擔任表演嘉賓，梁炳一上台，側田即問他拿喜帖，現場並奏起《結婚進行曲》，然後側田又作狀跪在地上求婚，又追問梁炳是否真的結婚，梁炳大叫：「係真嘅。」全場觀眾立即起哄歡呼。
梁炳續說：「今年12月18日我將會結婚。」側田打蛇隨棍上問他何時生仔時，梁炳笑說：「盡力而為、隨緣啦，嚟緊兩個月都會籌備婚禮。」側田要求梁炳講愛的宣言，但梁炳指女友Karen不在場而婉拒。其後梁炳獻唱《七友》時，觀眾紛紛走上台前跟他握手道賀。
廸士尼求婚
事後梁炳接受記者訪問，表示站出來交代婚訊十分緊張，現時他的婚禮已籌備得七七八八，由於親友眾多，所以要筵開40席才足夠，他說：「最希望賓客玩得開心，好多好朋友可以敍舊，𠵱家女友婚紗都準備好，我套禮服喺外國訂做，要花啲時間，所以我哋仲未影婚紗相。至於婚宴佈置同喜帖，都係我哋親力親為設計，兄弟團有一半係圈中人，大家知我結婚都好有興趣做兄弟，陣容有陳奕迅、許志安、張衞健、蘇永康、陳子聰等等，姊妹團有何超儀、徐濠縈同何韻詩等等，單係兄弟團都成20人，佢哋最好幫我頂酒，我嗰日唔會飲酒。」
梁炳又透露年初已開始安排婚禮，找專人擇吉日，原本有幾個日子選擇，但最終因酒店太難訂酒席而選定12月18日，並由律師朋友到酒店主持註冊儀式。問到求婚過程時，梁炳表示有天與女友到廸士尼遊玩，在放煙花一刻送上鑽戒求婚。
問梁炳的求婚鑽戒有多少卡時，他說：「冇所謂，最緊要開心。」婚後會否不設防造人？他笑道：「冇特別計劃，以前一直冇諗過要BB，𠵱家大個咗，諗法有啲唔同。」
側田擦錯鞋
許志安昨日往馬來西亞出席賑災活動，談到梁炳宣佈結婚，他笑說：「恭喜佢，為佢流一把汗，由細玩到大，終於見到佢成家立室。」問安仔是否做兄弟時，他卻說：「講過唔做啦，我怕娶唔到老婆。」會否心急想結婚？安仔說：「唔係心急，最緊要有份，遲啲都唔緊要。」
此外，側田前晚在演唱會上欲擦贊助商鞋，豈料把「屈臣氏」講錯「蒸餾氏」，認真瘀皮。
採訪：林妃、馬建華
娛樂資料庫：4兄弟情路難行
梁漢文宣佈婚訊，他在圈中與許志安、蘇永康和張衞健感情最好，四位兄弟多年來在愛海浮沉。
許志安
許志安於91年與鄭秀文相戀，終於04年分手，及後傳出安仔搭上女助手「細佬」。今年初有指他戀上年輕他14載的女模余德琳（Michelle）。
梁漢文
93年火速與湯寶如撻着，3年後分手。至98年他在友人介紹下認識女模Karen，拍拖10年，前晚宣告婚訊。
蘇永康
蘇永康於97年邂逅新加坡籍的馮麗清，99年結婚，至03年離異。後傳他搭上有線之花歐綺霞（Monique），現與一圈外人拍拖。
張衞健
曾分別與江欣燕及宣萱拍拖，99年於內地拍劇時認識女星張茜。去年6月女方懷孕，兩人秘密註冊，惜女兒胎死腹中。
資料來源：《蘋果》資料室
