教育界照理應該愛心爆棚，但青衣專業教育學院（IVE）就被網友鬧對動物唔友善。近日有唔少愛護動物嘅網民踢爆，青衣IVE嘅校園管理投訴附近野狗太惡，成日追住啲老師同學生，更試過一次有成十隻狗圍住個職員，搞到佢哋好驚，於是由1月起就放咗兩個由漁護署畀嘅狗籠喺度，入邊仲放咗食物，要嚟誘捕野狗。
狗主搵唔番有牌唐狗
不過，有網民投訴，話近期有隻唐狗明明有晶片、有主人，住喺附近山邊，但因為為食，結果入咗個籠度被IVE捉咗，仲送埋去漁護署。個主人好傷心，喺blog度話搵唔番隻狗。IVE就話啲野狗好嚇人，要顧及師生安危。不過啲網民就質疑，又冇師生真係被啲狗傷過，但IVE短短幾個月已經捉咗青衣八隻狗仔，仲話跟足漁護署指引，會繼續擺個籠喺度捉狗。
漁護署就話，佢哋只係應IVE要求去做，上個月都捉咗兩隻狗，但冇主人認領，由於佢哋性格好溫馴，𠵱家等緊好心人認領。