股市是否到底，是熊二？還是已進入熊三？暫時難以確定，但唔少股票，包括股仔和大價股，唔單止去到熊三，甚至可能已行完，隨時會出現急跌後的大幅反彈。
港股大跌市由去年10月底開始，第一個跌浪由31958到今年3月18日的20573，共下跌11385點，跌幅35.6%，反彈上5月2日的26374後開始第二個跌浪，由26374跌到9月18日的16283共下跌10091點，跌幅38.2%。兩個大跌浪，跌幅都超過35%，有足夠水位走棧，現時進入另一個反彈浪，恒指若升越9月22日高位19869後，有機會上試22000點。
較高位跌8成過晒龍
大市回升，跌到過晒龍嘅大價股，會率先有反應。就以中國遠洋（1919）為例，上周五市勢大跌，但佢已逆流而上，衝上7.77元後回收7.20元，仍升0.20元，升幅2.8%，強勢初現；呢類急跌股，一反彈，閒閒哋可升50%。
先睇下中遠點慘情！去年10月底，中遠威到震，衝上40元大關，最高40.80元，但跟住的一年，對股東來說係一個噩夢，今年10月2日，股價跌到6.30元，跌幅高達84.5%；即使上周五回升到7.20元，跌幅仍逾82%。
國際金融海嘯，全球經濟面臨衰退，航運股前景被看淡，係股價大跌主要原因，但跌得過份，鐘擺由一極擺到另一極，跟着而來就會大幅回升。現時中遠股價已出現雙底背馳，短期升勢若持續，則多個技術走勢都會出現入貨訊號，確認開展急跌後的大升浪，初步可見10元，下一個目標係15元，彈成倍，唔係好多，上番9月初時嘅股價水平而已。
亁散貨運需求料回增
航運股大超賣，大行亦認為反彈已逼近眉睫，高盛和瑞信指亁散貨運第4季需求會大升，高盛給予中遠的目標價為16元。另外，DBS唯高達維持「買入」評級，目標價23.57元；摩根大通評級「增持」，目標價22.10元；UOB目標價更達24.50元。
08年（12月年結）的上半年，中遠每股盈利1.57港元，估計全年達3元，股價即使升上15元，預測PE都只係5倍；09年雖然睇淡，但每股盈利仍有2.50港元，PE仲係好低，大有回升條件。
郭兆誠