噚日一班小朋友發表「2008小小施政報告」，由於人數眾多，一講就講成粒鐘。有份獲邀出席嘅民建聯陳克勤同民主黨甘乃威都好有心，聽足全場先走。所謂童言無忌，班小朋友講到香港人近年英文水平下降，批評政府現行英語課程嘅英語拼音法經常被忽略，搞到好多人英文發音不準兼詞不達意，好多人都驚咗講英文。
話同意學生建議
近排因一句「搓mybreast」而紅爆嘅陳克勤聽到呢度，即時面有難色，好似俾人點中死穴咁。佢喺總結環節時，就只係概括回應班小朋友嘅報告，冇就香港人英文水平下降呢個問題講番兩嘴。班記者行家見佢咁行貨，當然繼續追問，陳克勤就話同意班學生就改善英文提出嘅所有建議，包括將拼音法列入課程、增聘外籍英語教師等等。
講起小學生，陳克勤話早排去過天水圍一間小學，嗰度好多學生連個15蚊嘅飯盒都負擔唔起，間學校都好有計，整個大蒸籠喺度，畀學生翻熱由屋企帶返學嘅飯盒。佢話呢個諗法好好，反映好多時市民可以自己諗計，唔一定要政府出手幫喎。