敏妮寫呢個欄都有一段時間，成日都會寫到有關保險嘅嘢，對於好多保險從業員嚟講，敏妮講嘅內容應該唔係好啱聽。不過，趁周末整理吓敏妮blog嘅時候，收到一封保險業從業朋友嘅來信，姑勿論佢只係想借敏妮個blog抒發吓感受，定係覺得敏妮會明白佢嘅心情，所以喺敏妮blog度留言，敏妮都好安慰。
呢封讀者來信以「請辭書」為題，原因係佢對保險業有啲意興闌珊。
堅守信念寧請辭
讀者朋友話，做保險除咗希望搵錢，亦希望透過保險幫人，所以佢好鍾意同啲客仔分析理財需要，做份好嘅理財計劃。不過，保險公司最重要睇盤數，話之你幫個客設計一個幾咁專業嘅理財計劃，開唔到單都係失敗。所以最重要唔係個理財計劃幾咁妥善照顧客戶，而係可以賣到幾多產品。
呢位朋友仲話，唔少保險經紀攞住份過往5年都有好回報嘅基金去sell客。喺大牛市買垃圾都會賺到笑，問題係市況逆轉，顧客辛辛苦苦儲返嚟嘅積蓄唔見一大截。不過，喺呢個時候，「平均成本法」同「長揸必賺」成為咗推銷投資產品嘅金科玉律，就算跌市一樣可以sell。
正如呢位朋友所講，「若然留低，一係成為『sales』一類，一係繼續『專業』守住信念，前者未係我杯茶，自覺累人累物，後者除咗清高實際係無啖好食，不為五斗米折腰？貧賤夫妻百事哀，嗚呼哀哉！」所以佢最後選擇「請辭」。
金融市場睇業績
睇到呢到，再睇到電視上面嗰啲雷曼迷你債券苦主，真係有啲無奈。銀行職員有冇誤導投資者，真係好難講，始終客人又真係喺合約度簽咗名，但如果呢啲債券經你手賣出，望到電視上嘅場面，你會有乜感受？
溫敏妮
http://wanmanli.com/blogs/