噚日係金融海嘯之後首個自訂車牌拍賣會，樓股不振下，競投車牌嘅人對前景仍然充滿希望。做金融嘅伍先生同八方講，心水車牌「G0G0G0」佢志在必得，話希望自己嘅業績會創新高咁話喎，本來預成20萬買車牌嘅佢最後只係用咗3.2萬就投到。
有個「AAV」一出場就令到在場唔少人忍唔住大笑，兩個A喺上排，V就喺下排，形成個笑住嘅樣，呢個咁鬼馬嘅車牌俾盈富物業個主席張錦成用7萬買咗，佢喺樓市咁差嘅環境依然係咁樂觀。「B0SS」呢個車牌成32萬，就成為全日成交價最貴嘅車牌，出手咁闊綽嗰位仁兄唔肯透露身份，究竟真係老闆定係恨做老闆就冇人知。
最近嗰市咁差好多人都話揸CASH好啲，有人就用3.8萬買「CASH」。拍賣會上有人用萬1蚊買「F1T」，但係「HEALTH」只係值5,000蚊；有個車牌叫「MEGAB0X」，以為用5,000蚊投佢嗰個人係某商場嘅高層或者員工，點知佢話乜都唔係，只係自用喎！