憑「搓ourbreast」一舉成名嘅新進立法會議員陳克勤以後唔使講英文嘞，可以有樣學樣，學曾俊華司長咁大大聲講：「我冇英文講稿噃。」
此話怎說？《南華早報》肥仔郭記下一段漏網新聞，就係星期二下午，曾司長與任總裁、陳局長見記者，宣佈金管五項新招數，宣佈完就由任總裁回答記者，曾司長等三人在政府總部做所謂stand-upbriefing，已經做慣，在場記者自然以講廣東話者佔絕大多數，但既然雷曼迷債新聞已成為國際新聞，在場當然亦有講英語嘅記者啦。據肥仔郭所記，英文記者兩次要求曾司長用英語講多一次，曾司長第一次答：「唔用英文覆述，」第二次就話：「我冇英文講稿！」肥仔郭素來心水清，知道曾司長在美國名校MIT畢業，哈佛MPA，與曾特首同班，有乜理由怕講英文呀。陳克勤係中文中學畢業，加中文大學學位啫噃，都唔怕，順從記者，以英語回答，緊張之下，先至講出「搓ourbreast」啫，曾司長係喇沙（英文中學嚟㗎）畢業，留學美國，點解唔願意用英語答覆記者呀？金管局又抵鬧嘅，唔一早將「任五招」咁技術性嘅招數繙譯成英文畀曾司長解釋？佢哋唔知道國際金融中心嘅官方語言係英文咩？
據左丁山不時在記者會所見，本地政治人物幾怕見到香港電台英文台記者FrancisMoriaity，呢位仁兄係老香港，對政治民生問題非常熟悉，佢要「扑咪」，用英文問，在港台英文台播出，只係余若薇、吳靄儀、劉慧卿會歡迎佢嘅啫，社會主義派（包括民主派）議員都只能尷尷尬尬咁用英語回答，與陳克勤相比，好少少而已。有一次講競爭法，澳洲律師都唔肯回答Francis，成為笑話。
香港有啲評論員喜歡以說話取人，商界名人面對大羣記者，因經驗不足，反應稍慢，或用詞未能盡善，就會畀人批評為「無大將之風」；以此作準則，黃毓民最有大將之風，叻過晒所有行政立法議員，任志剛亦有大將之風，直情可以做特首，唔怪得任總企在曾司長身旁，笑容可堪玩味；可惜香港冇面部笑容表情分析專家，我哋搵唔到高人指點任總笑容之微言大義。