呢個周末，孫柏文見到歐洲大國啲元首開派對，傾救市。當電視新聞報道佢哋開記者招待會嘅片段時，我當然睇到實。法國、德國、前宗主國嘅話事人通通到齊。不過如果佢哋想達到嘅目標，係想減低銀行業嘅動盪，結果應該會失敗。
點解？因為請少咗個人。我睇電視同埋之後上網，發現冇愛爾蘭首相份，都知今次會議做show多過乜。
政府包底實安全
大家可能會問：「區區一個二百萬人口嘅小國，愛爾蘭嘅首相唔去，sowhat？孫柏文又膠up。」等我解釋點解。愛爾蘭政府上個禮拜宣佈，不論幾多，全面保證所有銀行嘅存款。消息一出，歐洲各國其他銀行嘅存款就即刻湧到愛爾蘭，相信下星期繼續。因為好簡單，如果你係一個喺法國、德國、前宗主國銀行存錢嘅存戶，你信你間銀行定係信一個主權國政府？
相信如果其他歐洲國家政府「唔跟到底」，學愛爾蘭全面保證所有存款，幾日內應該有多間歐洲銀行同時倒閉或被接管。我都唔想有咁嘅分析，不過條數就係咁計。
同樣情況都喺花旗國出現。財長保爾森見到花旗國啲非常低利息、傳統上未輸過存戶錢（因為投資傳統上非常安全嘅資產）、啲人用來代替普通銀行存款、不過唔係傳統被監管嘅銀行，提供啲叫做moneymarket嘅戶口，被人瘋狂擠提。所以9月29日就宣佈完全保證呢啲戶口，為期三個月。
可能因為呢啲moneymarket戶口嘅總存款額，達到34000億美元，所以如果存戶同一時間抽錢走，啲戶口經理人同一時間變賣戶口資產套現，市場會進一步動盪，所以財長出嚟保證係可以理解。
投靠愛爾蘭政府
點知個後果就係，當時只得十萬美元上限保證嘅傳統銀行存款，即刻出現擠提。資金湧入啲moneymarket戶口，放棄傳統銀行存款。不過因為係大客，冇人龍，所以冇人講、冇傳媒報道、冇人不誠實使用電腦。
再講，特區銀行存款保證得十萬元，現在冇一個本地銀行嘅債主（當然包括存戶），知道啲本地銀行資產係乜。如果出事特區政府會點反應？所以有理由相信本港大客戶已經投靠愛爾蘭政府或者花旗國moneymarket戶口。佢哋心諗：「未擠提？唔理性！」
孫柏文
http://phatdat.blogspot.com